立場新聞 Stand News

胡官鎅票?

2017/2/27 — 11:50

曾俊華、胡國興

曾俊華、胡國興

近排好多人講緊胡官係咪鎅票,胡官早幾日出嚟反駁,之後,又有著名嘅網台主持再反駁胡官嘅講法,兼且猛咁話提名胡官嘅民主300+選委係戇居。不才認為胡官客觀上係有鎅票嘅可能,不過呢個可能性唔高,更加唔係好似網台主持講到咁,俾胡官入到閘就差唔多等於俾數字2.0當選。

話胡官鎅票令到數字2.0當選,主要係話胡官參選攤薄咗鬍鬚曾嘅得票,令到原本想撐鬍鬚曾嘅建制選委「西瓜靠大邊」而投俾數字2.0。呢個推論,係有好多假設。

第一,佢假設咗好多民主陣營嘅選委打開口牌講到明會投票俾胡官,但係不才覺得呢個唔會係事實。民主300+好多人講咗提名同投票分開,佢哋俾胡官入閘喺想佢喺論壇講政改同廿二條立法嘅嘢,無咗胡官入閘,呢啲話題就會喺未來一個月嘅選戰消失,咁樣對民主陣營係好蝕章。到咗投票嘅時候,如果重係繼續依家鬍鬚曾俾西環打壓嘅狀況,不才唔排除民主300+好多人會考慮押落鬍鬚曾嗰度,睇佢哋依家係先押提名票落鬍鬚曾嗰度就反映咗呢個傾向。

廣告

今屆特首小圈子選舉咁鬼詭異,未到投票嗰刻都唔知有乜最新形勢,做乜要玩晨早打開口牌咁傻仔?不才按過去呢個零月嘅發展去睇,民主300+並唔係一面倒咁話鬍鬚曾係建制派就唔提名佢咁傻仔,但亦都唔係一面倒乜嘢價都唔叫就晨早俾曬啲票鬍鬚曾,民主300+都唔係傻仔啦。

第二,即使好多民主陣營嘅選委真係開口講明投胡官,咁,喺暗票之下,其實點解嗰啲想暗撐鬍鬚曾嘅建制選委要放棄投俾佢而轉投俾數字2.0呢?「西瓜靠大邊」,唔敢企錯邊,係要嚟做俾人睇,但係喺暗票階段係無作用架喎。

廣告

呢批人想暗裡反西環檯,就係唔想數字2.0贏,咁佢哋有乜誘因要喺暗票階段靠大邊轉撐數字2.0呢?出現呢類見鬍鬚曾票源薄就揀靠大邊唔敢撐佢嘅人,應該只係嗰啲相信西環會知道選委暗票投邊個而又覺得如果多人一齊反就夠膽反,出現呢類選委嘅機會唔係無,不個不才就覺得唔會好多,因為啲建制選委如果相信西環知佢投乜,咁有無胡官佢哋都已經唔敢撐鬍鬚曾喇。

第三,依家差唔多係人都知數字2.0啲票根本就唔實,有幾多建制選委想暗裡反佢,根本無人完全知,嗰啲原本想暗撐鬍鬚曾嘅選委點解會因為胡官出現而放棄投鬍鬚曾甚至會轉去撐數字2.0呢?如果佢哋係清醒,知道雖然喺第一輪投票可能有啲票去咗胡官度,但只要佢哋繼續撐鬍鬚曾,等數字2.0攞唔到過半數,鬍鬚曾入到頭兩名,咁到咗第二輪投票,胡官嘅票好可能番嚟鬍鬚曾嗰度,令鬍鬚曾依然有機會攞到過半數當選。呢點,就係胡官反駁鎅票論所提出嘅論點。咁當然「唔清醒」係好多建制派嘅特徵,不過,既然能夠唔聽西環之笛而準備暗撐鬍鬚曾,咁嗰批建制選委都應該重係醒少少嘅。

至於胡官參選係咪存心嚟鎅票,坊間有唔少討論,不才唔敢講胡官係唔係鬼,但係就認為話胡官係西環派嚟嘅講法,其實非常奇怪,因為胡官走出嚟話選特首,喺係舊年10月27號,嗰時689重未知/重未肯定自己會被DQ,而鬍鬚曾又遲遲唔話選,嗰陣正值宣誓風波,民主陣營其實係好低氣壓,胡官喺宣布出選之後不斷吸睛鬧爆689,又暗示叫鬍鬚曾快啲決定去選,當時係扭轉番少少個社會氣氛,689係去到12月9號先至壽終正寢宣布唔連任,如果話西環喺10月尾放胡官嚟鎅票,用鬧臭689拉低佢民望嚟曲線撐689,咁呢個,又真係曲得太過離奇,如果話西環一早預到689會被DQ 所以喺10月尾就已經部署定放胡官嚟等遲啲曲線撐數字2.0,咁呢個又想像得西環啲人太醒喎。如果胡官真係鬼,不才會諗呢個係幕後更大嘅操盤人即係習某布嘅一步棋,而唔係西環班友囉。

好多人覺得胡官係鬼,主要因為佢當初講過如果自己同鬍鬚曾嘅票源重疊,就會慎重考慮退選,但係到咗12月初又話即使鬍鬚曾參選佢都唔會退出,因為自己參選係想贏,唔係嚟陪跑。不才認為,胡官最初出嚟係真係因為睇唔過眼689,唔想689連任,大家只要細心睇吓胡官喺記者會鬧689,完全唔似背稿背劇本,好多細節係記者問到乜佢就即時答乜,一take過,句句到肉,如果胡官係扮嘢嚟鎅票,咁佢就真係可以攞到最佳編劇兼最佳男主角,扮嘢可以扮到呢個境界,真係梁朝偉都要行埋一邊。

至於點解胡官好似前言不對後語,不才認為,喺胡官出咗嚟話參選之後,好多人讚佢,佢亦都好認真咁去搞參選搞政綱,越搞越認真,越認真亦都越自我感覺良好,尤其係689被DQ前神憎鬼厭但係又好似連任硬咁款,而鬍鬚曾又無聲無息甚至經常有傳紅燈論,咁不才認為胡官喺嗰段時間built up 咗覺得自己唔係嚟陪跑係要贏嘅諗法,其實並唔出奇。

咁洗濕咗個頭,佢依家點都會繼續選落去啦,況且,佢係大法官出身,都係自信心爆膨嘅人,佢覺得鬍鬚曾唔識法律唔夠好,佢咪照插囉,咁其實胡官鬧數字2.0都一樣鬧唔少喎,早排數字2.0出醜,胡官都係經常出po潤佢啦。

胡官入閘,係好事定唔好事?

不才認為,咁就要睇胡官之後點做喇。照計胡官依家應該好清楚自己係攞唔到建制票,如果佢入閘之後勇得濟猛插鬍鬚曾搞到鬍鬚曾嘅民望俾佢打殘曬(雖然呢個機會唔高),令到建制選委放棄揀鬍鬚曾,咁係有可能佢同鬍鬚曾攬炒,數字2.0當選。如果無出現呢個情況,咁胡官同鬍鬚曾一齊入閘,不才認為策略上係好事。

不才寄望,胡官可以不負香港人所托,會喺提倡22條立法,反抗西環治港、反抗大陸官員干預香港內部事務呢方面,不斷強攻數字2.0,令佢民望再猛跌;而喺跳出831框架重啟政改呢方面,向鬍鬚曾出擊,喺保到鬍鬚曾嘅民望唔大幅下滑嘅情況下,輔助民主陣營要求鬍鬚曾提出更接近真普選方案嘅承諾,若然鬍鬚曾肯講出更具體且有助邁向無篩選嘅政改路線,甚至講埋22條同23條立法同步,咁撐鬍鬚曾嘅民望唔靠公關都會再大幅推高,鬍鬚曾係知道唔會一嘢講咗啲直接落北京面嘅承諾,不過,唔落北京面而又幫到香港人爭取真普選貫徹一國兩制,係重有空間嘅,鬍鬚曾要攞到真正嘅民心同埋堅實嘅選票,咁佢就要動腦筋搵到呢個妥協位喇。

如果胡官未來喺真普選同埋22條立法呢兩大議題做到嘢,助攻數字2.0落敗鬍鬚曾當選,兼且將相關嘅民主理念向普羅大眾傳遞,不才覺得,胡官就真係功德無量,到時,肯定無人會再話胡官係鬼,胡官,會係記入香港民主發展歷史嘅一位勇者。

發表意見