立場新聞 Stand News

致同僚:善良之槍的呼籲 (上)

2014/12/30 — 10:58

我是一個輔警,老散一名。

我在蘭桂坊做很多夜尾(夜更) , 也遇過很多市民的刁難,飲醉酒的人真係好麻煩,我個人也很討厭蘭桂坊這種性質的地方,我一直視之為罪惡的溫床,FIGHTING 非禮 THEFT 樣樣齊,仲吸引好多內地假和尚行乞同 FORM 8 仔(南亞仔)偷I PHONE。間唔時就會有 EVENT 迫爆老蘭,D人飲到醉曬玩警察,俾人偷野俾人打,俾人摸醉左暈又要警察幫。但無計,警察份工就係咁,佢需要你幫個時阿SIR前阿SIR後,你話佢犯法個時起曬鋼。我都好想老蘭D人乖乖過馬路,行返上行人路,D無醉既港女都唔聽你講啦,我甚至想老蘭呢個罪惡溫床從此消失。這樣紙醉金迷的夜店就我個人而言真是亂中之亂,鏟除左就可以做少好多野。但我必須承認市民有喜愛夜蒲的自由,而我地當差都有保護夜蒲市民生命財產的責任。其實遊行集會都一樣姐,市民係有咁既自由,基本法都寫到明,而且香港貴為國際示威之都,示威遊行數目最多又最有秩序,香港警隊呢方面譽滿全球,POE (公眾集會 EVENT)一直都係警隊工作一部分,協助 POE 順利完成無人受傷係職責所在。而家只係個 POE 長D耐D姐,睇返2014世界上有幾多單示威,人地真係玩到好激,燒曬車,又係留好多 DAYS, 外國玩佔領一玩就半年,呢個係世界潮流,大家都要有心理準備,陸續有黎,要調節下以前對集會的想像。你都換左 I PHONE, 無理由仲諗大哥大時代。

清場在即,我語重深長真心想同各位伙記講幾句。我知大家捱左咁耐好辛苦,一心為服務市民加班銷假仲要被人叫黑警、警渣係會感到委屈亦好傷自尊。日日返工已經勁俾人鬧,FB 俾人 UNFRIEND, 斷六親。幾時當差的社會地位仲低過黑社會,變過街老鼠。無得睇醫生。唔開心,明既。唔忿氣,明既。

廣告

但我真心勸大家一句,上級 ORDER 真係問返學堂個句「LAW 唔 LAWFUL 呀?」先好做,保障自己,千祈唔好使用非必要武力。

第一,因為一向「有大食大,上級揹飛」已經唔岩用,睇下暗角7警就知,有 CIP 係度架,佢叫你打,你真係打以為無事,到頭來佢自身難保,點攬D細? 追究起上黎總督察都唔夠照。而家成街相機,千祈唔好以為白恤衫俾 ORDER 一定無事。特別係而家呢個時勢,D新昇豬粒 (見習督察) 從來都無行咇被問候經驗去提昇EQ,一係就係好多年無行過咇D舊制白衫,一黎就見D (或見返D) 咁大場面,仲要以為自己好威威可以大展官威,君不見好多白衫仲激動過D伙記沙展,以為著住套白衫在警署外都可以受到警署內的尊重,以為自己真係不能被挑戰,起勢就又拉又打。D上級咁唔冷靜,做伙記仔真係好難做,你使用不必要武力打人,我做細唔通教返上級做野? 你手指指話要拉要鎖,我覺得無必要都無得唔做喎,呢個時候真係望下附近有無可靠的沙展用前線的智慧降降溫。如果唔係拉咁多人返館,好多手尾跟,又唔係咩重犯,可能講一兩句表達下心情,大事化小咪唔駛值日官咁多野做。何必自己人玩死自己人。

廣告

仲有而家D學生哥學生妹瘦到條籐咁都企前線,如果俾人扑幾棍,你再輕力加一棍,就係果棍打到佢重傷殘廢可能死埋,到時真係千古罪人,監都有得坐。大家都唔係黑心既人,我諗無一個警察想咁樣清場。為左高層一句「全力以赴」,豪賭自己前途,仲可能入冊,一D都唔值。仲要其實可以搵執達主任分幾次清,中信都可以斯文清啦,唔明警隊今次搏咩。有無諗過你一句「全力以赴」做個 MISSION IMPOSSIBLE,要好多前線同事 TAKE RISK 可能犯法。所以就算一次過清唔到都唔好覺得有損警威而夾硬清。記住你做唔完有下更接替的。

一句到尾,學堂個句,當得差,一隻腳已經踩左入監倉,萬功不能補一過。作為執法者,權力係法律賦予的,同時亦被法律限制。只有在法律之內執法,法律才能保護我,CP(署長)都保唔到我。

祝大家平安收工

(待續)

發表意見