立場新聞 Stand News

致廢中廢老的香港人(我都係一個香港廢中)

2019/8/12 — 11:03

(8.11 立場新聞圖片)

(8.11 立場新聞圖片)

【文:一個香港廢中】

近日聽到不少向香港前線年輕人發出疑問,前線嘅年輕人,你哋做緊乜?點解咁做?想得到乜?知唔知咁樣繼續落去會輸曬民意?有感而發,想講一下自己作為一個廢中嘅觀點感受:

我深信大家都絕非想玩分化割蓆,亦非常理解大家嘅出發點唔係去批評前線嘅後生仔,可能只係唔明白前線嘅佢哋諗緊乜,佢哋每個星期堵路丶去衝,係想得到D乜⋯⋯

廣告

我係一個喺八五年出生嘅香港廢中,八月五號都有參與罷工;但我真係冇能力體力智力去參與前線嘅工作,我亦冇可能代表到佢地…但我諗佢地所做嘅嘢,應該(可能?)係想不斷去做,希望增加警方嘅人力物力體力嘅成本,可能佢哋認為,如果一停落嚟,對方就會有喘息嘅機會⋯⋯你可能(其實我都覺得)佢哋好幼稚⋯⋯

至於近期我哋和理非講嘅爭取民意,你(我哋)有咩新招呢?以南韓前兩年「反總統」事件作為藍本例子(PS:其實我覺得依家我哋嘅狀況更加似南韓八零年代開始嘅「光州事件」⋯⋯)?大家都應該知道,南韓係個有主權嘅國家,連續十幾個星期以十萬計乃至百萬計人出嚟集會,佢哋政府當然會頂唔順,我哋香港喺前線嘅年輕人,即使由今日開始每星期都唔出嚟衝、唔堵路,齋出嚟和理非集會遊行,其實出嚟嘅人一樣會越來越少,民意一樣會慢慢流失,因為對依個港府/亞爺嚟講根本冇感覺,佢哋完全唔需要睇民意!而香港果部份金錢掛帥嘅人,依然會話我哋班所謂和理非每個禮拜都要出嚟封路改道遊行,知唔知對零售丶旅遊業等等帶來幾大損失?

廣告

老實講,我再重申一次,我唔係亦冇資格冇體力成為/代表前線!又或甚至有時作為口水廢中嘅我,有時候都會覺得前線班後生仔真係有 D 過火,但係我真係唔會亦冇出嚟問過「點解」,冇去批評過佢哋。因為我真係冇橋,作為一個廢中和理非,只能儘可能地喺網上參與文宣工作,有遊行嘅就出嚟遊行,但係話說回頭,依家班狗官同 popo 連遊行都唔批⋯⋯so, what should we do?我哋有咩更好嘅方法或者有咩資格去說服班後生仔?就憑我哋和理非三十年來失敗嘅經驗?其實我到七月一日都唔明佢哋衝立法會嚟做乜,慢慢嘗試代入佢哋嘅諗法先開始明白,佢哋唔係感到失望,係絕望!對佢哋嚟講,往後嘅二十幾年慢慢玩完,同今日即時玩完,根本冇分別,大家甚至可以話佢哋係垂死掙扎,其實的確香港已經係垂死掙扎階段⋯⋯所以即使有時我都唔太同意佢哋某 D 行為,我都冇話出嚟指手劃腳,因為我自己都說服唔到自己有咩計/有咩理據去勸佢哋唔好做依樣唔好做果樣…我只能夠同班後生仔講,小心D,Good luck......

 

發表意見