立場新聞 Stand News

致所有香港警察:其實好多香港人都明

2019/7/16 — 10:58

7.14 警察

7.14 警察

【文:一名香港人】

電視畫面令人心酸,唔單止係因為見到越來越多香港人為呢個城市嘅將來作出行動,更加係因為越來越明顯,冷血政權為求私利要求特區政府一步不退。林鄭政府唯一嘅處理手法,就係硬要推香港嘅維持治安部隊出去承受由政治問題引致嘅壓力同問題。警察而家被要求做嘅嘢根本同警務工作本身嘅性質完全唔同。到咗呢一刻,做人同做狗真係有得揀。

講起又講,你哋又知唔知點解幾個月前仲俾人尊稱緊嘅「呀 Sir」,但係而家俾人叫做「狗」?並唔係因為你哋做嘢狗;而係因為政府引導咗你哋去做「門口狗」呢個角色。

廣告

村屋嘅門口狗聽話、忠心,只要有陌生人行過就會吠。而主人見到佢哋咁主動去做佢哋嘅工作,就會大讚話咁係盡忠職守。但係門口狗亦有時不問對錯,無論係郵差定係隔籬屋,一樣吠,甚至咬。好多被虐待嘅狗其實並唔為意其實主人對佢哋好差:冇得入屋訓、一日食一餐餸尾等;但係仍然會「盡忠職守」,主動去吠人。呢個係門口狗同主人建立咗嘅關係,喺對等嘅人與人關係十分少見。

而香港市民每一次叫警察做狗,其實係希望喚醒返你哋俾個 Force 攞走咗嘅人性同理智;唔好再俾躲係政權背後嘅人好似隻狗咁利用,做返一個香港人。你試諗下,你未當差之前,如果你舊公司上司同事成日搵你着數、俾鑊你孭,你仲會肯同佢蝕底?就好似朱 Sir、七雄咁,你覺得下個特首要「修補關係」嘅時候,政府真係唔會「為咗法治」,全面調查同起訴咩?

廣告

唉其實香港人當中好多人都好同情冇柴嘅警察,電視鏡頭喺你哋對面都睇得出三柴好串、呀咩好識刷鞋、豬粒乜都唔識,但係全部都會戇居居叫你哋去企一啲你哋都唔知有乜謂嘅位。你哋好多人會覺得無得揀,但係同時亦有一部份嘅人係因為受咗個 Force 同政府嘅氛圍而去主動施暴,倒頭來憤怒嘅群眾還拖嘅時候,只會令到冇得揀嘅各位受傷,一下唔覺意仲可能係換嚟終身嘅殘障,難道真係政府養你一世就抵咩?

多啲同警察朋友同事講啦……而家政府用緊所謂嘅兄弟情、OT 同「榮耀」去推政府眼中嘅 PC 卒仔幫政府頂,講真如果真係死咗,政府真係會覺得大家可憐咩?? 外國好多警察會因為政府唔理佢哋嘅安危而罷工,美劇啲差佬軍人成日有一句對白:“I did not sign up for this shit.” 

做人定做狗,選擇企喺政權定香港人大愛嘅一邊,絕對有得揀。大家保重。

發表意見