立場新聞 Stand News

致親愛的香港人:我懇請大家,為年輕人,站出來

2019/8/1 — 11:23

致親愛的香港人:

八月五號,我懇請大家,為年輕人,站出來。

如果你認為,你無本錢罷工,無本錢為抗爭犧牲一日嘅人工,無本錢無咗份工,請你今晚臨訓前,靜一靜,諗一諗:難道年輕人,就有附上自己前途的本錢、無咗幾年甚至十年光陰嘅本錢?

廣告

被控暴動罪當中,有教師、機師、護士、學生,甚至有路過幫忙嘅途人,最細一位嘅年紀只有16歲,試想像吓,如果被捕嘅係你嘅親人,你嘅仔女,你仲會唔會猶疑?

你同我都清楚知道,其實喺頭盔、面罩、眼罩後面,佢地同我地都一樣,都係愛護呢個地方嘅香港人。佢地為香港、為我地呢幾代唔敢企到咁前嘅人行出嚟,爭取我地唔敢爭取嘅嘢,對抗我地從來唔「得閒」對抗嘅政權,為香港人背負上如此大如此不公義嘅控罪⋯⋯其實全香港,已經沒有往後退嘅本錢。面臨失去一整代人嘅沉重代價,我地還有本錢不站出來嗎?

廣告

香港從來都做唔到全城大罷工,原因當然明白,但今非昔比,我地去到呢一刻,已經無退路。

一份工,真係無咗,可以再搵;但一個家,無咗,可以去邊度搵返?抗爭中每一位都係我地嘅屋企人。為咗無私付出嘅每一位兄弟姐妹,你又願意付出幾多?

大人們,如果唔想佢地再受傷、被捕,唔單單係諗點樣幫佢地買飯券買裝備捐錢,而係諗,作為支持呢個抗爭嘅你,作為主張和理非嘅你,有咩可以做但又未去到盡?當遊行已經失去效用,罷工、罷交稅就係下一步,就係而家。

尤其如果你係公務員、金融界、運輸界、航空界、飲食界等可以令政府直接感受到逼切性同嚴重性嘅行業,不論任何一個崗位,都係呢場硬仗嘅關鍵,呢一刻香港更加需要你地同你地嘅同業們站出來。

懇求大家,八月五號,一定一定要行出嚟,付出你一天嘅時間,支持全港大罷工。唯有癱瘓經濟(而個人認為甚至唔係一日半日,而係長期罷工),呢個政府先會真正感受到壓力,先會考慮收手。

成年人們,係你地為呢班勇敢又遍體鱗傷嘅年輕人,展示你地承擔嘅時候喇。

(原文無題,題為編輯所擬;作者facebook

發表意見