立場新聞 Stand News

致陳家駒:去領事館要人通過法案,可否搞清楚想點

2018/10/15 — 11:54

陳家駒

陳家駒

【文:山鬼】

尋日遊完行,本土派去到美國駐港領事館要求接信, 促請美方通過《香港人權及民主法》。  

老實講, 基本上我係絕對支持成班人上去示威,亦都好支持通過《香港人權及民主法》。但所謂七孔流血還七孔流血,死還死。兩樣野係唔應該溝埋。

廣告

咁請問去人哋個行政部門, 要求人哋立法部門通過法案係咩玩法?????????????????????

用香港嘅處境去講,你會唔會去特首辦示威,叫人唔好通過財政預算案?

廣告

我真心建議,本土派嘅領袖可以諗清楚成件事嘅講法(左膠 term:論述)先去做。一陣人地外媒真係問你點解黎啊,咁你話想 U.S government pass 啲乜,人地報岀來就真係笑話了。

尤其要知道,外媒對本土派唔算太好,上次陳浩天咁大單野,啲外媒係開重火力笑_佢。你唔係泛民/自決派佢地唔會留太多情面俾你,所以要更小心。

作為本土派,無人會對你仁慈。

你可以去領事館門口叫人關心下香港情況,講下人工島等於俾晒香港錢大陸,甚至嗌到話希望取消香港關係法。其實我覺得都係有膽識嘅行動。

有無用係一回事,但我覺得肯做都算係咁。本土派唔同左膠泛民,好多都係基層子弟,一方面冇權貴撐腰,另一方面亦都冇資源。講錢講視野唔會係人地對手。

作为本土派嘅領袖亦都只能夠靠意志同毅力。要記得走爛仔路線嘅,好多本身都唔係爛仔,只係呢條路最啱佢個 market, 真正嘅爛仔行呢條路線係唔會成功。

係本土派大佬近乎全滅嘅年代,有決心/野心嘅人,要諗清楚做緊咩。

最後想同你講聲,加油。

發表意見