立場新聞 Stand News

花園道山寨文革擴散中

2015/10/5 — 7:56

特首梁振英 ( 圖片來源:資優教育基金 )

特首梁振英 ( 圖片來源:資優教育基金 )

香港政治研究一直有兩大門派,一是中大劉兆佳,以權力管治為核心,係俾斯麥式的現實政治分析,迹近馬基維里「帝王術」。另一派掌門乃港大卜約翰(John Burns),以制度為核心,分析殖民地體制及公務員制度,我們大學年代總會讀過兩人作品。

近日《蘋果日報》訪問了卜約翰,佢講到梁振英政府管治,用咗一個好「精準」嘅字眼形容佢:Idealogue,譯作意識形態分子,民國時代譯為「意底牢結」,更加係神級繙譯。Idealogue在西方政治學中有其特別意義,指專搞意識形態鬥爭、務虛不務實、空想而偏執的政治人物,以黨同伐異、政治表態為管治手段。歷史上大家最認識的就係毛澤東,佢病態空想共產主義,似患精神病。大躍進後全國大饑荒,佢竟然擔心糧食過多,農民土法煉出廢鐵,稍有常識都知唔係鋼材,根本就係廢物,但佢竟然相信,此乃偏執。

香港進入文革狀態,主因亦係空想偏執之意識形態分子掌權,呢種人正如卜約翰所言,冇實際執行力,非務實之徒,一味務虛搞「論述」。猶如中共四九年後主力應搞建設經濟發展,執行權力應移交周恩來、鄧小平等務實領導,老毛要靠邊站,佢點會甘心離開舞台中央,於是發動一波又一波政治運動,搞意識形態鬥爭。而吸引追隨者方式,只有一招,就係不斷製造「人民公敵」,小事化大,再變成全黨全國危機。

廣告

但全國輿論控制在黨中央之手,於是「小題大做」揭開文革序幕的批判歷史劇《海瑞罷官》,係先在上海《文匯報》發表,姚文元在北京眼中更唔知乜水,點會諗到背後是江青、老毛,當時被針對的北京市委書記彭真、鄧小平等人仍懵然不知,仲指示中央報刊不准轉載。

香港人對呢段歷史已經忘記,但老毛政治鬥爭之手法,今日香港所見,竟然熟口熟面。「港獨」分裂中國氣燄高張,乃製造敵人手法,將小事化大,直到在施政報告中批學苑《香港民族論》,借題發揮,而曾痛批龍獅旗之陳佐洱走上台前指摘香港人未依法去殖化,大家才恍然大悟。香港既然處身尖銳鬥爭,建制力量自然要團結在「超然」特首身邊,更加唔容許有人覬覦下屆特首之位。

廣告

至於第二個敵人,自然係抓階級鬥爭,故技重施,炮製被認為有異心之商界領袖。林行止認為李超人被批鬥與反梁有關,係正確分析。李嘉誠指出有人借文革方式批鬥,令佢不寒而慄,雖然冇指名道姓,大家都心知肚明。一條蛋散八月寫篇網誌,無聲無息,9月初習近平訪美前內地官媒網站轉載,然後香港炒作,其實翻兜當年批《海瑞罷官》模式。大家見到連李嘉誠都俾人鬥、俾人郁,其他人仲敢起飛腳,尤其係自由黨田少、林大輝及唐營人馬,上兩個月人人磨拳擦掌去馬造王或選特首之形勢已為之一變,曾鈺成亦忽然表態話自己同梁振英好friend。當日借重組之名郁完曾德成、鄧國威,打窒傳統左派、公務員、再到商界李超人,所為何事?兩個字:連任。

此乃花園道山寨文革,擅搞政治鬥爭之意識形態分子製造寒蟬效應,當集體不寒而慄時,邊個敢去馬挑戰特首寶座?睇嚟明年3月前香港仍然有排搞!港大搞完散場,中大就應該開波!

發表意見