立場新聞 Stand News

萬五蚊上樓大法

2015/5/20 — 17:21

富二代大談萬五蚊上樓大法,每月三千,一年三萬六,十年三十六萬,按現時樓價按九成都好勉強,網民大鬧富二代入世未深,太離地,咦,咁今次我又撐佢喎,萬五蚊上樓其實唔難,我舉幾個例子比大家聽:

朋友阿共,佢雖然搵萬五蚊,但一個月儲足萬五蚊,一年儲十八萬,兩年就上左樓,佢分享心得:「其實唔難,衣食住行,講衣先啦,我最鐘意去大型連鎖牌子買衫,記得搵十四日內免費退換,衫著兩三日,唔好剪牌,然後拎去退,買過新,日日有新衫著之餘仲唔駛洗衫燙衫添!食呢個麻煩少少,搵商業區快餐店,貪佢地多OL,OL減肥唔會食太多,飯市個陣樓面人多,執野阿姐一慢你就可以享受到仍然溫暖嘅二手飯,有時我嘴刁起嚟仲會揀靚女食過嘅嚟食,飲水我通常係公司飲足八杯水,再執個膠樽裝2L拎走!住同行,嗱,我就訓街嘅,仲要訓係公司附近,基本上無車費可言,星期日有時仲行入西貢,行去屯門,過海麻煩少少,係碼頭同人講無帶錢,大約半個鐘就可以過到海!可能你會問,喂,萬五蚊交稅都無咗幾舊喎,巴打你就心水清喇,星期六日我通常會係街乞食,閒時炒炒iPhone,抽下新鈔,咁就解決咗綠信封同強姦金問題啦!其實唔難喎,我賺夠喇,分享比大家聽,大家一齊上樓啦!」

朋友小勉,佢都係搵萬五,不過有另類睇法:「唔賭唔知時運高,依家五歲小朋友已經諗買樓,刁佢老味,想當年我三歲就睇賭神,之後咩賭聖、賭俠、雀聖、雀后、樸克王、中華賭聖、賭俠大戰拉斯維加斯、連唔出名嘅番九之神、包剪揼必勝法我都睇撚晒,你考緊會考個陣,我已經係日本麻雀俱樂部嘅九段、馬會金咭會員!唔好講我認叻,最瘋狂個陣,試過朝早贏咗層樓返嚟,晏少少輸返出去;又試過朝頭早賭輸隻手,傍晚贖撚返!賭足十年,我第一桶金係零八年世界杯贏返嚟,個時我睇中八爪魚保羅跟住買,翻幾翻不知幾和味,不過四年一次大茶飯唔係成日有,好彩我醒,識得長買利物浦對家,呢種就係經常性收入喇!早排大埔LuLu燈力十足我都賺唔少,跟住我睇報紙話原來係咩……媽茄婷野,假喎,咁我就無買喇!再鋒利嘅刀都有生繡嘅一日,有次我玩微信,有個靚女話幫我搞投資黃金,見同佢幾好傾,佢又吹到自己有幾十%回報,咁我咪比佢打理下囉,點知半年唔夠,佢話我幾百萬輸Q晒!我打比佢先發覺原來佢係男人扮女人!呢一刻,我看透世事了,我想平靜一下,所以我搵咗個黑市醫生賣賢,然後拎咗嚟做首期上樓。」

朋友芝芝,佢作為女性搵萬五係唔錯,但佢無咁易滿足:「我每月儲三千,儲咗五年,拎咗十八萬去韓國整容、隆胸、改名、駁髮,然後用咗三千蚊去咗個有錢人先去到嘅船P,識咗三個富二代,跟住我只係同佢地講我有咗,佢地就急急船比扔煲落仔費我,我拎咗筆錢買樓,銀行話我份糧供唔到樓喎,好嬲豬,所以我將筆錢再投資整容,再去有錢人空難P,今次我醒,反正煲一隻雞蛋要三分鐘,十隻都係三分鐘,今次我拎住筆錢,唔駛供直接Full Paid!上樓唔難囉,你的樣子如何,你的日子也必如何,投資股票?不如投資自己個樣。(如果係男仔點好?)呃,咁麻煩少少喇,你要變性先,又晒咗十幾萬,不過學黃子華話齋,男人搵錢,切咗佢就有,女人搵錢,隆了胸就掂,你兩樣都做晒想唔發達都難啦!」

上樓難唔難,見人見智啦,成功例子你地都有眼見,全部白手興家,全部都有血有汗,全部都好獅子山,全部都好勵志!

寒戰裡面劉德華都講:「非常時期,要用非常手法!」

如果你認為自己只係一個普通人,你又想上車,又無我三位朋友咁有決心點算好?

贈你一句:如果你搵十年都係搵萬五蚊,都係儲三千蚊,樓市都係有升無跌嘅話,咁你唔好諗買樓啦!

 

原刊於作者 facebook

廣告
廣告

發表意見