立場新聞 Stand News

蔡咏梅自發派逾2500份選民登記表 「師奶係民主運動嘅藍海」

2016/4/28 — 19:46

【文:朝雲】

26/4 大埔 

大埔市中心的人潮川流不息,居變不動的,原來是我們俗稱的「師奶」。

廣告

蔡咏梅與一班義工,長駐大埔鬧市,風雨不改,仍盡最後努力,呼籲選民登記。

(編按:蔡咏梅於去年底的區議會選舉以素人身份參選大埔大埔墟選區,單挑民建聯現任區議員李國英,最終得票44.11%)

廣告

***

問:點解咁訓身推動選民登記?

蔡咏梅:我地真係唔想依場選舉輸。係新東補選,見到好多人都想投六號(梁天琦)。我就諗而家新東有六席,如果多啲人做選民,會唔會攞到七席呢?

可能我太樂觀,但我就係唔想後悔。既然有得做,就由自己出啲力。

***

問:開左幾耐街站?反應點樣?

蔡咏梅:我地幾個朋友都住大埔。有時朝早會開,夜晚又會開。

其中一位朋友係看更。佢做完夜班,放工唔返屋企,直接過嚟同我開早晨街站,有時係返工之前,又會幫手做晏晝街站。

早晨個個都要搭巴士,搭火車,隧道係好多人嘅必經之路;如果唔落雨,晏晝同夜晚通常就係街市,落雨就多左番嚟依度,每次開兩個鐘左右。

***

問:早午晚都有?

蔡咏梅:總之有義工可以幫手,能夠同我一齊,就會開街站。頂多每日開兩次街站啫。大概派左2500份選民登記表。

***

問:如果一日擺兩次街站,咁咪一日四個鐘?

蔡咏梅:都有嘅。我先煮早餐俾家人,餵埋貓;同6:30放工的看更,係7:15會合,就係早晨開街站嘅時間。

夜晚嘅話就先煮好飯,再落嚟。不過將工作提早啲做,擺完街站可以買餸返屋企。

師奶有師奶嘅好處,的確係多啲靈活時間。所以我常常說師奶係民主運動嘅藍海。佢地有時間,有誠意,有堅持,應承左一定嚟。

我幫忙反對小三 TSA,帶著一班從未做過街站的媽咪,佢地好快就可以投入到。我地好應該發掘佢地,只要有人先行,所有人都做得到。

本來做會計的我比較內斂,係一個幫自己改變的挑戰。人不會突然進步,需要鍛鍊。擺選民登記街站,口才進步左。原來兩個鐘幾快過,冇想像中咁長。

***

問:派左2000份登記表?(無意造作,筆者真的很震驚,忍不住重問確認)

蔡咏梅:係2500份以上。

初時開咪驚俾人鬧嘈。但結果無嘢,好多謝市民和義工。

我仲幫緊飲食界登記功能組別。原來好多人都係選民,但佢地唔知。

源於有線嘅新聞刺針,我特登打電話去 check 條例,說服街市一位賣豬肉的老闆登記。

但原來食環署分兩個部門,處理街外與街市的牌照。係出面開鋪,就叫食物牌照;係食環的街市開檔,就叫准許證。食環話兩者唔同,街市內嘅鋪頭冇得登記。

賣嘅都係豬肉,不過牌照唔同名,點解係街外賣豬肉先可以登記?咁樣唔公平。

底層嘅職員好官僚,話名唔同就唔得。但我已經問過選舉事務處,食物牌照有好多種,由賣雪糕到賣魚都得,我仲繼續 confirm 緊。

飲食界除左立會議員,仲可以選34人入選委會選特首。政府根本冇宣傳,佢地根本唔想出聲,最好冇人知。

我問過選舉事務處,佢地都話好多人唔知自己界別。覺得自己有資格,即管遞表。

***

問:為何你會從一位家庭主婦,熱心地幫助民主運動?

蔡咏梅:我係中五時,屋企人買居屋而搬入大埔,應該已經有三十年。

我本身是會計,做師奶的資歷不長,只有幾年,屋企有老人家要照顧,才轉做全職主婦。

傘運前我只係投票,傘運時我只係落去睇,送吓啲物資,都係因為機遇。

傘運前我開始睇主場新聞嘅文章,覺得有用,慢慢潛移默化,係幫到香港,特別係傳媒俾收編嘅時候。

我住新富區,傘運後第一場補選就係依度。羅舜泉呃津貼被禠奪議席,自己要坐監,就推個仔(羅曉楓)出來選,我地睇唔過眼。

但更冇天理嘅,係去到區議會選舉,佢個仔贏番*。

(註:因出缺而起的補選,建制有兩個候選人,何萬傑與及羅曉楓分薄選票,郭永健當選。到區議會正式選舉,建制協調到只派一候選人。郭永健得2062票,羅曉楓得2447票獲勝)

我因為助選,無意中識到郭永健,朱凱迪等,開始有團火參與社區工作,接觸政治。

去到區議會選舉,唔想俾民建聯李國英連任,差唔多最後一日先報名,參加大埔墟的區選*。

(註:蔡咏梅得865票,李國英得1096票獲勝)

***

問:家人對你的轉變有何看法?

蔡咏梅:冇所謂嘅,家人嘅政見都與我相近。我先生有時都擔心我安全,擺街站時的確試過被騷擾,扔單張,拍檯等。但我地都係師奶,啲男人做到咩啫。

***

問:將來會不會繼續參選?

蔡咏梅:因為好遙遠,比較難答。但我選完已經提醒自己要留係社區度。

記得以前有些參選的區議員,木木獨獨唔做嘢,之後就唔記得係邊個。當其時我都諗過,選完後冇人會記得我。但原來唔係,係街站係街市,都有人記得我,同我打招呼。

本來我都擔心留係社區要做啲咩,但原來好自然,凡有 event 就幫手做,例如幫楊岳橋助選,幫選民登記,大家都會覺得你做得啱,唔係選完就走。下一目標就係幫立會選舉。至於之後會點,就要之後再算。

發表意見