立場新聞 Stand News

薯粉你問我答

2017/2/8 — 11:58

【文:草言】

(A)「你有票咩?做乜咁興奮」

答:

廣告

(一)(若閣下身邊有選委朋友)我呢度起碼有X個選委睇到,點解唔可以表態。你係我度留言,隨時可影響選委取態。

(二)有票先可以評論,有票先可以興奮㗎?美國選總統你有票咩,選到侵侵做乜咁肉緊?舊年新界東補選你住九龍你有票咩,你做乜咁興奮撐六號時代革命?

廣告

(B)「撐曾俊華,你點對得住雨傘嘅人?又話毋忘初衷?原來唔係我要真普選,係我要曾俊華。」

答:雨傘爭取唔到真普選,係事實。有部分人堅持仲係日日撐黃傘出街,日日鳩嗚,我尊重呢份堅持。但係無可否認,香港人過去兩三年,真係除左自焚同政變外,乜野方法都試過,都係徒然。講白D,由雙學到梁天琦到品客,大家都係買緊一個希望,而且,心底上大家都可能會問,呢個希望最終會唔會帶來失望。

真普選最終為左乜?最primary嘅目的係為左市民能確保一個有相當民意基礎嘅人上到台(而呢個人最終都可能令大家失望,你睇下台灣)。無真普選,中央比邊個你你都無得嘈。宜家嘅情況,係中央真係有相當機會比一個民意相當高嘅候選人上台,最後客觀效果都係「有相當民意基礎嘅人上到台」。當然,現時情況與真普選有其他不同,例如當選人只係對小圈子負責,例如如果當選人PK人民下次無得用選票踢走佢,我明。但係呢個「退而求其次」,我覺得值得搏喎。

(C)「不要忘記,689最初也是高民望上台。」

答:

(一)如果你覺得689同品客係同一類人,咁係大家判斷不同,無野講。不過我要提醒你,品客嘅高民望,主要靠反689路線而得嚟。被掟蛋、強調香港人意識、中港球賽等,兩人路線有明顯分別。仲有,若果非品客守住盤數,香港庫房嘅儲備一早比去用左搞內交同策略性投資(請參考澳門)。

(二)689在2012年投票前的民望不算是高(雖然是三位候選人中最高);當年的324民間投票,最多人揀的選項是白票,而當時亦有主流意見指,若疑似黨員梁振英當選,香港即淪陷。

(三)真正高民望當選的,是2005年曾蔭權。若品客能將香港社會帶回2005年至2008年光景,少政治爭坳,令市民專注其他事,我認為那是一國兩制實踐廿年來最好的時光。

(D)「你黐左!曾俊華不承諾撤回831,你眾籌比中共立廿三條!」

答:要求建制派有勝算希望的候選人提出撤銷831,是天方夜譚。不解釋。

品客政綱點講政改?「我將以最大的誠意,就實現普選的問題與社會各方面、各黨派緊密聯繫,並努力促進他們之間、以及他們和中央政府之間的溝通對話,盡量消除誤解、收窄分歧、求同存異、凝聚共識。我會如實向中央政府反映香港各界意見。待水到渠成,我們會提出具體的方案,全力推動達成市民對普選的訴求。」係水到渠成之後,即係有條件推行政改後,先推。

咁即係點。咁即係有可能水唔到渠唔成,就不會重啟政改。不重啟政改,831就是non-issue。那麼不重啟政改,便不推動民主向前?是的,但在永續831的前提下,不處理政改議題是second best alternative。

至於廿三條,已經太多評論說過了。簡單嚟講,四個參選人都話廿三條係憲制責任。胡官個立場(先普選,後22+23)最接近泛民亦最可取,我同意。但睇野要睇大局,對廿三條的立場不是一切。

會較接受的對廿三條立場,是分開階段長遠立法(用品客講法係「先易後難」)。來屆特首可以承諾啟動,但廿三條立法「任重道遠」(註:曲),不會是一兩屆特首任期的時間可以完成。始終有些事,要來便來,唯有攤長嚟做,希望同佢鬥長命;呢個處理方法,亦係好政務官style嘅一種所謂「食單」嘅做法。

 

(作者簡介:專業人士、公共知識分子、KOL、社交媒體大亨......以上通通不是,只堅持用common sense便可分析時局(而common sense is not common))

發表意見