Rosina

Rosina

非牟利機構工作十多年,自覺係好人一個,愛生活,愛自由,希望簡簡單單開心過日子。

2019/8/10 - 10:17

行會雙葉係真白痴定扮傻?

昨日 (8/8) 在電台節目《在晴朗的一天出發》中,葉國謙:一定要抽出背後兇手,我知道示威者有特訓,聽講在社區會堂同長洲。佢哋的裝備媲美防暴警察(主持:例如呢)有黑色衫,唔係普通的帽,有眼罩(主持:有五金舖喎),地鐵站好多飛派,你估好平咩?就算市民肯每人捐幾蚊,邊有咁多錢?

葉劉淑儀:大台即係好犀利的大佬指揮,令示威者識用 telegram 、連登同Airdrop (主持:連陳志雲都識用)但佢哋用得好犀利,宣傳招數層出不窮,又文宣又短片又識開記者會。

聽或睇完真係唔識既比你嚇死,識野既就笑死,究竟佢地係真白痴定扮傻?葉劉在雨傘時同樣講過無外國勢力啲細路點識用 Snapchat?事隔五年,變左 Telegram  、連登同 Airdrop 。 Telegram 只係一個工具、平台,人人都可以下載,可以用。年紀大唔係罪,但固步自封停留在石器時代就退休啦,點可以再服務而家的社會? Airdrop 係蘋果電話的工具,根本就唔係高科技,要高人教至識,講出來真係唔怕比人笑。

廣告

阿爺捧出來的人,無常識都算,最重要係懶。收風只靠五毛黨吧,如果想了解今次運動的實際情況,何不落場睇下?怕被人鬧可以包到實,現在 fullgear 出去,無人會懷疑你,咁咪睇下邊的人擺低錢、地鐵車票同物資。如果有外國勢力都只係咁簡單的裝備,太睇少外國了吧?車票係平但有咁多人擺低,大部份係和理非的市民自發,如雙葉仍賴運動關鍵係年輕人,實在又懶又笨。

奴才不會有自己想法,只會執行老闆指示,當然覺得辦遊行、示威至區區開花、開記者招待會、做文宣等等要用腦的活動無可能無一個好勁的大佬,而且以佢地的經驗,要派好多錢至有人撐。但在現世代的年輕人看來,每事齊心協力商討再各自爬山,其實好簡單,但夏蟲不可以語冰,阿爺的維穩費真係洗得冤了。