立場新聞 Stand News

補鍋與鋸箭 梁特的連任厚黑學

2016/10/11 — 9:18

資料圖片:梁振英

資料圖片:梁振英

周六晚曹星如爭取超蠅量級拳擊金腰帶,曾鈺成現場撐Rex,曾俊華身在美國也po文支持,至於梁振英今回也唔執輸,出文抽水,可見大家都進入campaign mode。

689公開表示對自己連任未有消息,聽落奇怪,好似完全唔關自己事,正在等候發落一樣,可能這是他現階段真正處境。但以上屆689處心積慮奪位可見,無論中央態度如何,佢都會照既定部署為自己造勢。由於收取UGL5,000萬一事是死穴,於是就頻頻出拳,先高調出律師信畀《蘋果》,主要唔係告人,而係要公開表示清白,英澳政府都冇話調查。另一招就係叫手下廉政專員白韞六代佢洗脫,不斷表示李寶蘭去職同調查UGL事件無關。再加多一招搵白宮發言人寫去《信報》插林卓廷。問題佢越搞就越多人知道UGL是連任死穴,所以立法會P&P動議走唔甩,𠵱家689所做正是堆沙包畀建制派有藉口否決,但建制派在特首入閘敏感時刻,仍然會乖乖集體挺梁嗎?問問曾鈺成吧!

689選舉工程已經開鑼,但chok極都chok唔起,得幾件幫倒忙梁粉僱員、財閥出聲,連老董都唔敢表態。外邊一路傳出689連任訊息只有一個核心:「只有他可穩住香港亂局。」呢個說法能否取信北京?實在成疑。因為689本人及其幕後支持勢力,才是香港亂局根源。689連任捨我其誰說法,明眼人一睇就知乃師承《厚黑學》補鍋法,此法乃香港政治公關界常用伎倆。

廣告

話說飯煲漏水,主人請補鍋匠來補。補鍋匠一面用鐵片刮鍋底煤煙,一面對主人說:「請點火來我燒煙。」他乘主人轉背,用鐵錘在鍋上輕輕敲幾下,那裂痕就立即伸長,等主人轉來,就指給他看,說:「你這鍋裂痕很長,上面油膩了,看不見,我把鍋煙刮開,就現出來了,非多補幾個釘子不可。」主人埋頭一看,很驚訝,認為自己好彩遇上好工匠,否則鍋子不能用了!及至補好,主人與補鍋匠,皆大歡喜而散。

港獨乃689敲出來的裂痕,將之有意誇大、提升關注度,令香港表面進入尖銳政治鬥爭狀態,傘運造成社會裂痕,689則在傘運後四處點火,慌死後生仔唔夠激,終於搞出一條港獨路線來,此時就用起《厚黑學》第二招鋸箭法:話說有人中箭請外科醫生治療,醫生只將箭幹鋸下就收工。問他為甚麼不把箭頭取出?他說:那是內科的事,你去找內科好了。用鋸箭法對付雨傘運動後的世代翻轉,就只有起訴、判刑一招,結果造成立法會選舉激進勢力抬頭,因為689無心亦無力,要真正處理箭傷,是需要同社會和解,拉攏泛民重回中間路線,但佢冇此政治能量,「人和」遠比唔上曾鈺成硂曾俊華,所以就惟有繼續搞鬥爭,將局勢推向更極端,逼建制派歸處邊支持佢連任。

廣告

《厚黑學》乃中國人權術秘笈,中式《君王論》,香港英治下不彈此調已多年,今回總算開了眼界。

(原刊蘋果日報

發表意見