立場新聞 Stand News

西環集團毒招 葉劉做 Plan B

2016/12/5 — 7:23

葉劉淑儀,圖片來源:商台片段截圖

葉劉淑儀,圖片來源:商台片段截圖

最近特首選舉紅燈綠燈滿天飛,令人眼花撩亂,財爺出閘遇紅燈,葉劉又話得到綠燈,據報道月中就會辭去行政會議職務,宣佈去馬。目前消息滿天飛,其實全部都係吹風,可能來自梁營、也可能來自西環、甚至可能自己搵人放。總之北京就會等選委選舉大局已定,再數吓三大板塊得票先會有定奪。

所謂紅燈綠燈論,經過2011年梁振英衝紅燈成功,兼且冇受罰,就已經變成冇意義。衝燈故事的教訓係只要有謀略,利用共產黨內部派系權鬥之裂隙,就有機會主導局面,最後關頭中央反過來受牽制,押注於衝燈者身上。

今屆北京推遲選舉欽點,好明顯係有棄梁之考慮,但共產黨並非鐵板一塊,由中央到地方各相關部門在香港都有各式各樣的利益,需要有統一意志的過程。尤其是西環集團是梁治下最大得益者,以協助特區政府依法施政之名,成為香港政治利益分配者,一個有民望而強勢的特首,並不符合西環的利益。

廣告

反而港澳辦不在本地搵食,有一定利益區隔,利益衝突反而少。曾俊華的最大問題是民望高,這才是死罪,特區政府強勢,一眾靠維穩費搵食之「專業政治組織」就可以收得工。2005至2008年曾蔭權民望高時,香港邊度可能有愛字頭、周融這類組織人馬出現。

幾年前西環官員曹二寶的兩支管治隊伍論,引起本地輿論反彈,經過梁振英這位兒皇帝這幾年工作,根本就變成了一支管治隊伍,就是黨委一元化領導,當日表決政改發生「等埋發叔」蝦碌事件後,一眾建制派頭目哭喪嘴臉排隊去西環謝罪,歷歷在目。西環利益首選當然是梁振英連任,保持太上皇地位,並且安插更多自己人加入當問責官員。

廣告

問題是當習近平一直不就梁連任表態,事情就起了變化,西環就要做好Plan B準備,葉劉就是Plan B。當年老董廿三條一役,葉劉搞到一鑊粥,去史丹福洗底回港從政,組織匯賢智庫硂新民黨,一步一步重新上位,背後全靠西環支持。劉江華敗選後成功加入問責官員行列,留下之地區左派組織公民力量,便全部過檔新民黨。今次立法會選舉西環契女容海恩,也安插代表新民黨出選。

肯定葉劉除梁振英外,相對其他候選人係同西環關係最密切,香港有一班港豬中產,政見上唔支持泛民,但又嫌左派老土,視葉劉為港英公務員出身,辦事有效率,於是就比票佢。睇唔穿葉劉所代表之政治利益。

西環此招甚毒,若一旦梁被棄,葉劉就可以順利頂上,相反若梁可以入閘,建制派出兩人,中央會否再考慮比多個曾俊華入閘,出現三人混戰呢?若最終變成葉劉對梁,兩個是但一個勝出,最後都係自己人,西環治港格局依然,黨委一元化領導依然。

西環計劃是否成功,最終仍取決於ABC陣營得票有幾多,因選委乃政治中人,當然醒過太古城中產好多,知道葉劉政治底細。香港政局,關鍵在ABC,而ABC的意思,是Anyone But Commies!

 

(文章原刊蘋果日報

發表意見