立場新聞 Stand News

覺得全民罷工/阻塞交通冇用既入黎

2019/7/31 — 16:32

有人話全民罷工同港鐵不合作運動冇用,唔會搞到林鄭,只係自己打飛機同搞到民意反彈。

我可以好肯定同大家講,全民罷工同阻塞交通先係最有用既行動

古今中外,所有大型社會運動最勁係有兩種可能,一係癱瘓社會運作,二係武裝革命。

廣告

武裝革命,好可惜,係香港係未有可能。就算我地依家啲 gear 全部升級到最頂級防具,甚至大量人出酒,都未必搞唔掂橡膠子彈、水炮車,更唔好講真槍實彈。有人話我地可以拖到黑警崩潰,但佢地只不過係開得多OT,而我地係損兵折將,每個禮拜重傷幾十個、被捕幾十個。大家要承認事實︰鬥武裝,一定係我地輸。

咁點解癱瘓社會經濟運作有用?因為癱瘓經濟,係最直接損害所有權貴既利益。

廣告

中共要香港黎做乜?咪就係要利用香港既金融制度、專業服務,去滿足中資走向國際市場既需要(好似阿里巴巴黎香港集資上市)。大陸既有錢官商,亦要係香港投資,或者利用呢度既財富管理服務。如果香港經濟癱瘓,股市樓市動盪,呢啲計劃通通會嚴重受挫。你有冇諗過快啲出老解,破壞香港國際金融中心光環,一齊攬炒?其實由我地自己黎癱瘓經濟,等於我地主動製造同樣甚至以上既效果。

香港既商界、跨國企業,佢地可能反對修例,但一定係牆頭草,因為即使運動失敗,佢地依然會繼續係香港做生意,繼續賺錢。但當運動真正踩到佢地既利益,呢班有權有勢既人就要被迫去諗︰一係就撒資,一係要施壓要求政府讓步或鎮壓。

冇政權可以頂得住經濟癱瘓幾多日,因為呢個係去到真真正正「不可管治」(ungovernable)既狀態。埃及民眾出黎遊行及大罷工18日,穆巴拉克已經要落台。

係香港搞癱瘓性行動仲有兩大優勢︰

一) 呢度係國際金融中心,癱瘓香港產生既槓桿效果係難以想像

二) 香港交通超級密集,依賴公共交通,我地唔駛搵好多手足搞不合作運動,已經足夠阻塞主要交通

相比上街頭抗爭,至少唔會有手足被捕同被告暴動罪,政府亦無乜藉口用高武力鎮壓。罷工係會有非常大既壓力,但如果唔係要養家活兒,罷工至多係冇咗份工,唔駛死。搞港鐵,更加最多係犯港鐵附例,罰幾千蚊。所以,癱瘓性行動既個別成本係低得多。我地已經透過衝擊行動,引發政府好多錯誤回應,激起民憤,係時候要轉向需要更大民意支持,但亦可以向政權施加更大壓力既癱瘓性行動。

只要有幾萬人罷工,聯同幾萬個學生一齊投入不合作運動,足以癱瘓全城運作,香港熄機。唯一既危機,就係民意背向,令不合作運動冇辦法維持落去。我地見到,尋日既不合作運動之所以可以成功,其實係因為月台上好多市民支持我地,甚至黑警都唔敢即刻捉人,呢個就係民意既力量。只要二百萬人繼續支持下,癱瘓行動不出一個月,我相信政權只剩兩個可能︰接受人民訴求,抑或撕破顏面以殺人暴力鎮壓。

簡單講,我建議︰

一) 繼續上街,但轉向遊擊,保存實力,流血不能白流

二) 全力投入發動罷工、不合作運動

三) 能罷工既就罷,唔罷工既就用交通問題做藉口,被動配合

四) 全力鞏固民意,向市民解釋

文宣方向︰

唔好即刻屌,溝通行先,溫情說服又好,義正辭嚴又好,多管齊下

(同黃絲講)如果你唔想繼續有年輕人自殺、受傷、被捕入獄,停止犧牲;如果你唔想送中條例捲土重來,唯一方法就係全民罷工同不合作運動,癱瘓香港。請你支持同埋幫手說服更多人接受

(同中立至淺黃講)社會公義大是大非面前,冇人可以置身事外。你反對呢啲行動,絕望既人只能自殺或走上街頭,頭破血流,坐十年監,呢啲鮮血有你既責任。你可以唔罷工,咁唔會冇咗份工,最多係日日塞係交通上、冇咗份勤工獎,損失有限。請你唔好反對,忍耐一段時間

求下大家同意既話幫手推,我唔想大家再以為衝係唯一手段,不斷犧牲

發表意見