立場新聞 Stand News

記招學領導 — 「我以為我剛才已經答咗」

2019/7/23 — 14:39

多次睇林鄭記者會,發覺佢經常講以下呢句:「我以為我剛才已經答咗。」

細心分析,呢句簡單嘅說話,隱含三個問題:

1. 理解別人有問題

廣告

做領導者,最重要能力之一,係要理解別人,掌握對方想法,從而作溝通帶領。對同事或外界嘅詢問,要看出問題背後佢地真正所想,對症下藥,釋除疑慮及導引希望。

我以為我剛才已經答咗,即係根本連答非所問都唔自知。讀唔到人真心嗰句,注定係一個永遠離地嘅領導者。

廣告

2. 表達能力有問題

假若完全明白對方所問所想,真心以為自己已答得完滿答得清楚,可惜人人覺得妳含糊其詞,左閃右避,提問者搞不清答案,也是領導者大忌。我相信打工仔嘅一大惡夢,係唔明老細講乜。

我以為我剛才已經答咗,即係妳講完無人明,要人重覆再問,從時間資源角度睇,係一大浪費。

3. 自省態度有問題

一個好嘅領導者,會經常反躬自省。若果同人地溝通唔到,或產生誤會,唔會諉過於人,而係先問自己有冇地方做得唔夠好,思考點樣可以改善。長期應對提問,人地都覺得唔滿意要不停翻問,更應該懷疑自己。

其實有腦嘅人,都明白特首個位難做,知道妳有啲嘢唔方便講唔可以講。難為開唔到口,唔代表唔可以答得更得體,所以公關係一個專業。就算明知答非所問,即使講一句抱歉,話自己已盡力講到最清楚,最少都可以緩減一點反感。

我以為我剛才已經答咗,其實唔講呢句一樣可以照答多次,但偏偏忍唔住要用呢句開頭,仲要有時笑笑口咁講,態度讓人覺得帶點輕視,係無謂嘅意氣,公關智慧欠奉。

林鄭下台,對我嚟講唔係一句情緒口號,而係林鄭真係冇領導者嘅能力同氣度,其實真係唔適合領導香港。

連處理記者幾條簡單問題,都搞到咁,我地又如何寄望妳能夠處理香港複雜嘅社會問題呢?

#紛亂中不忘學習
#只有自我提升才能幫到香港
 

作者facebook

發表意見