立場新聞 Stand News

認同梁振英連任會令很多人失望 葉劉淑儀強調應換特首

2016/10/27 — 12:29

葉劉淑儀,圖片來源:商台片段截圖

葉劉淑儀,圖片來源:商台片段截圖

行會成員、新民黨立法會議員葉劉淑儀承認有興趣競逐明年特首選舉,她認為不論做得好不好,都應該換特首,因為社會求變的心很強,要給社會有改變的希望;又稱梁振英應面對現實,「你係咁無民意基礎嘅,你夾硬選到,都做唔落啦!」對於作為行會成員,要求換特首算不算「跳船」,葉劉淑儀自言只是講事實,又稱一直都支持政府,給予政府最忠誠的意見,默認已經「仁至義盡」。

葉劉淑儀今早出席商台節目《在晴朗的一天出發》,她在節目後被問到若梁振英連任會否令很多人失望,她表示「我覺得會啦..... 我嘅判斷係會,雖然佢聽見咁講可能會好唔開心,但我講事實」。她在節目上又多次強調香港應該換特首,給港人有改變的希望。

葉劉:其實立法會嘅混亂係社會嘅反映,立法會各派別個個都有民意基礎,搗亂嗰啲都有民意基礎,代表一啲市民嘅不滿,所以呢個亂局,特區政府真係應該好好反思點樣處理。

主持:點處理呢?

葉劉:我認為要換行政長官。如果又係...即係無論佢做得好定唔好,我唔係針對佢個人,即係你要畀(社會)有個希望,改變嘅希望吖嘛

主持:好多說話都話,社會愈亂,現任(特首)得到中央信任程度愈高?

葉劉:我唔知,我唔同意。你信唔信中央係睇住香港一路亂落去、立法會秩序崩潰落去、乜嘢都做唔到,繼續都話畀呢個人當家最好?我自己唔信中央咁冇智慧。如果係咁冇民意基礎嘅,你夾硬想選到,你都做唔落啦!你面對呢個現實吖嘛!我哋應該為香港整體嘅福祉,甚至係影響國家,香港亂對國家都唔好,唔係話保一個人吖嘛,點解一定要保一個人啫?

......

主持:你作為行會成員,但話要換特首,你算唔算「跳船」呢?

葉劉:我係評論一個現實啫,下嘛?我哋嘅職責係要支持現任特首,我一路都咁做喎!我會內就畀最忠誠嘅意見、認為最符合公眾利益嘅意見;會外撐政府喎,電視發牌都撐喎,下嘛?我做到盡晒我責任啦!

主持:仁至義盡?

葉劉:係咪你都同意啦,下嘛?

主持:哈哈哈哈。

葉劉:係咪你都同意吖?

廣告
廣告

發表意見