立場新聞 Stand News

認同請廣傳

2019/8/31 — 10:05

作者製圖

作者製圖

依兩日大搜捕,拉左三名立法會議員,兩名眾志成員,一名區議會議員,仲有無數咁多個義士。

點解政府要係 8.31 前大搜捕,而唔揀其他遊行集合前的日子?依個係我地理解「大搜捕」既關鍵。

從林鄭月娥前幾日開始不斷用「緊急法」試水溫、今日的大搜捕,加上梁振英今日係fb既說辭,書生大膽推斷,林鄭政府依兩日終於獲得中央既幫助,全面統一在港的建制派同利益集團既口徑,亦獲得中央首肯,可以真正狠狠地進行大清算。

廣告

8.31 係林鄭清算既第一炮。依兩日盡拉有頭有面既人,又反對左民陣既遊行,示威者無左合法既遊行集會,就更方便告暴動或非法集結,亦令到多數和理非都唔夠膽出黎,然後就輕輕鬆鬆進行大圍捕。只要聽日和理非人數唔夠多,書生估計不論你係和理非定勇武,警察都會有強硬手段作出拘捕,因為可以一次過嚇怕晒兩邊人。

所以,聽.日.人.數.一.定.要.夠.多!

廣告

只要人數夠多,仲有一線生機(唔好硬碰唔好被捕,因為政府想拉晒所有勇武義士)。如果聽日人數唔夠多,所有出場既人都有機會被捕,就算唔係聽日被捕,都鐵定會有秋後算帳。

**********

如果我地聽日捱唔過林鄭第一炮,咁跟住落黎會點?林鄭月蛾應該會開行火力清算所有勇武義士,並籍著今次大清算,順道整頓教育界、司法界、傳媒界。

依三大界別向來都係中央既眼中釘,係「勾結外國勢力」、「反中亂港」既溫床,可以預期政府會盡拉依界別內參與過、高調支持過既運動既人;唔夠證據檢控既話,就會用各種方法撤去各界別人士既職位,換人同收返相關權力。

依三大界別可以話係香港公民社會既根基同力量,只要清算晒依三大界別,ok,我地熟悉既香港就咁玩完。(完)

**********

如果我地聽日捱過到林鄭第一炮,咁跟住落黎會點?林鄭月娥有兩步棋可以走。

1. 重複第一炮,繼續「明」拉更多有頭有面既人,「暗」搵黑社會打應該唔入既,繼續嚇怕和理非,然後再等下一次大遊行去試水溫。

2. 行險棋,動用《緊急法》去逐步限制網絡、「戒嚴」式限制市民既出入自由、修改法律令到檢控及清算更容易。

(1) 既機會遠比 (2) 大,因為 (2) 仍然係令好多本地建制派同利益集團有所顧忌,即使林鄭已獲得中央首肯,必要時可動用相關權力,應該會受到上面提及集團盡力既勸止,因為實行《緊急法》真係如同宣佈「一國一制」正式攬炒。除非林鄭動用緊急法動用得好聰明好漂亮(書生猜測依幾日林鄭正係同緊相關團隊研究緊點動用《緊急法》得黎,唔會完全撼動「一國兩制」(至少係外國政府眼中)。

**********

如果係 (1),我地仲可以繼續鬥落去,只要唔好意志消沉,捱過《香港人權與民主法案》通過,加上盡量獲得海外聲音既支持,拉攏更多中間派權勢者介入,配合埋中美貿易戰之間既變數(依個要睇美國佬點做),應該仲可以長鬥長有。

如果係 (2),書生唯一諗到既方法就真係真攬炒,唔好比林鄭動用《緊急法》得黎又唔會撼動到香港既經濟同根基。我地要盡量迫政府將攬炒推至極致。如果唔係,都係等被大清算、大整肅。

香港人,你地有決心一戰未?

補充多一句:假如林鄭動用《緊急法》,我地又逼至真攬炒程度,應該會引發更多有權勢者同中產階級既反彈,如果大家捱得過,令到中央發現比左咁大權力林鄭都收拾唔到局面,就可能有生機。

作者 Facebook

發表意見