立場新聞 Stand News

認真考慮:盡快放棄曾俊華 執行 Plan B

2016/12/5 — 17:27

曾俊華北上訪京,十一月廿八日在與國務院港澳事務辦公室主任王光亞會面。

曾俊華北上訪京,十一月廿八日在與國務院港澳事務辦公室主任王光亞會面。

【文:李開步】

這篇文係寫俾兩班人睇:一班係希望香港有個好特首,會帶領香港繼續向前嘅人,即係大部分黃絲;而另一班,係喺曾俊華背後,諗住佢做咗特首後有油水撈嘅人,即係啲地產佬,大孖沙同有錢佬等等等等。

我嘅問題係,其實你地有冇諗清楚,曾俊華係唔係有可能做到特首先?

廣告

如果只係覺得佢理念同自己相近,冇咁乞人憎,但又明知佢冇可能會贏,支持佢,咁同打飛機又有咩分別?

至於佢背後班有錢佬,要記住上屆下錯注嘅教訓,會死得好慘。舉大家最愛的李嘉誠為例:上屆落錯注買唐英年,結果呢,成個大陸市場冇得玩,昔日雄霸一方,依家都要撤資,共產黨都唔再睇佢。所以各位有錢佬,睇實啦,再落錯注,隨時連香港都唔受你玩!

廣告

當然,根本問題係,曾俊華有冇機會做特首先?

哪管你無法接受,我諗冇人會反對,以阿爺在特首選委中有決定性嘅票數,邊個要做特首,都一定要佢首肯,呢個係今屆特首選舉無可避免嘅因素。不過,先唔好理啲乜人吹乜風,用最客觀角度睇,阿爺都絕對唔會俾曾俊華做特首!

點解呢?死證!佢本來就係末代港督肥彭個私人秘書!何謂私人秘書?即係肥彭個貼身親信啦,仲一定係好親嗰隻喎。以中英外交關係嘅敏感,以共產黨當日咁唔妥肥彭,又邊有可能俾佢個私人秘書做特首?

第二,係人都知曾俊華自小已經移民美國,曾經係美國公民。哪管你依家已經放棄咗美國藉,但呢個身份大敏感啦。美國喎,特朗普喎?我係阿爺都唔信你啦,點知你會唔會係間諜先?即使退一百步,我都寧願搵另一個費事煩啦。

第三,好多人都知曾俊華自細喺美國長大,所以連中文都學唔好。但大家又知唔知,佢其實到今時今日喺香港成三十幾年,都講唔掂普通話呢?甚至同啲大陸官員開會,都係講英文?大陸班官見你講英文,唔明你講乜,又點會俾你做特首?

好多人都知曾俊華成為「鬍鬚曾」、「薯片叔叔」之前,佢喺政府內部個花名叫「鬼佬曾」。搵個鬼佬做特首?你以為阿爺會貪你夠國際化咩?

其實阿爺近來已經開到口,話唔會俾鬼佬曾入閘。前幾日,有個叫盧文端既人,喺文匯報登咗篇長文,好明確咁話阿爺覺得鬼佬曾唔夠班做特首,仲講到明話阿爺唔俾衝紅燈,「以免釀成不良後果」。

至於呢個盧文端係咩人呢?首先,佢係全國政協外事委員會副主任,第二,佢係民建聯監委會主席。去到呢個level既高官都出到聲叫你唔好衝紅燈,難道你真係認為有機會出閘?

有啲人話,上年689都係闖紅燈喎,最後又唔係做到特首?咁我想問,上次你俾人強姦過一次,唔通今次又會咁易俾你得逞?

所以,無論係黃絲又好,係利益集團又好,我建議趁住呢一兩個月,盡快捧過另一個人選代替鬼佬曾。例如胡官就係一個好嘅代替人選,起碼阿爺從來未曾對佢宣布參選有任何阻止。

而且在現實情況,胡官比鬼佬曾更有機會吸到泛民選委嘅選票。始終鬼佬曾係現屆政府官員,如果泛民真係投佢一票,令佢成為特首。假若到時佢又行返689依家條路線,強烈打壓民主,到時恐怕泛民會俾選民鬧死,連個位都冇埋。所以,若果換咗我係泛民,我都寧願保險啲投胡官一票。

我做咗十幾年政治新聞,老實講我對鬼佬曾印象唔係幾好。仲記得兩三年前,佢嘅評分仲係負數,大家都覺得佢廢,係唔知點解吹吓吹吓,就吹到佢做特首。葉劉之前批評佢hea做,我其實好同意。自從佢做財爺,呢十年來,香港經濟發展就停足十年。呢個係好客觀嘅玩實。

我同大家一樣,都對香港特首需阿爺首肯呢件事非常不滿。但冇辦法架喎,客觀現實就係咁。所以,大家不如及早行plan b,搵定代替入閘者,而胡官將會係一個好人選。

否則,一旦讓689成功連任,觀乎佢依家為選舉嘅不擇手段程度,下一個任期佢開始為自己落台後作準備,到時可能會有更不堪入目嘅情況出現!

很多人認為香港已死,所以對時事不聞不問不管不理不談。但我覺得大家真係太樂觀了,死不是最可怕,落地獄更可怕。

發表意見