立場新聞 Stand News

說好的反暴挺梁Show呢?

2016/3/7 — 7:40

特首梁振英

特首梁振英

旺角騷亂後幾小時,689定性為暴動,殺氣騰騰祭出自一九七○年針對六七左派暴動修訂的殖民地惡法「參與暴動罪」對付示威者,林鄭立即和應指摘泛民冇一致譴責暴力。開頭係威係勢,但唔夠兩個星期,鎮壓暴動路線全面收皮,政府官員口中的「暴徒」,在立法會補選中得到六萬幾張真選票,呢棍打到應。

左報立即伸出橄欖枝捧梁天琦,最奇怪的是,按照劇本689理應高調接見當日平暴英雄,以示嘉許,一齊握拳高呼反對暴力分離主義、捍衞國家領土完整,然後一級一級召開記者會,表態反暴挺梁,人人過關。但過去兩星期,唔單止冇商界大孖沙站出來反暴挺梁,連建制派都hea hea地求其交差算數。究竟發生乜事?

到兩會揭幕,謎底終於揭開了,本來兩會應該係反暴挺梁、堅決反對香港暴力分離主義運動上演之舞台,但個show並冇按照689之劇本演下去。首先港澳辦主任王光亞見689,對「暴動」口徑相當mild,並且完全冇挺梁表示,到政協會議,一樣冇反暴挺梁show出現,只有一個譚惠珠表示特首只做五年唔多好,其他人一律收口。689做大龍鳳,無非都係想兩會期間得到中央大力支持,兇走其他競爭者。而日前張德江所傳達中央立場,明顯中央對旺角那場所謂暴動有不同睇法。范徐麗泰會面後引述張德江指,「旺角這種所謂街頭暴力,要用大局觀來看,因為其他地方都有,他認為港人智商高,多人心裏明白,如果將香港搞亂,將來日子難過,只不過不說出口,特區政府、香港人民可以有能力解決這問題。」她進一步表示,聽不到張德江有譴責旺角事件,但認為要用大角度去看。

廣告

左報捧梁天琦,兩會期間張德江提出的大局觀,說明北京掌握了香港獨立、分離主義暴動內裏究竟是甚麼一回事!如果香港街頭衝突屬全球青年造反、反建制社運,即係同分離主義冇關,咁梁振英過去一年政治上死咬港大、《學苑》、港獨及本土派,所為何事,唔通真係為維護國家安全領土完整?定係製造危機鞏固自己權力?曾鈺成表示旺角事件後北京派人來港做工作,了解內情,如果張德江說法是中央的看法,那就等如否定了旺角「暴動」定性。

今年兩會對梁政治前途未到決定性階段,明年兩會後才到特區行政長官選舉,估計今年底便由政治局常委敲定人選,九月立法會選舉,將會成為香港民意對梁連任的一次「公投」,梁以鬥爭為綱,未來幾個月仍會繼續挑機,指使李國章、何君堯等人在大學生內攪局點火頭,製造更多危機,問題是建制派是否願意與梁攬炒呢?

廣告

其實,梁之連任問題,已經不容拖延,因為挺梁的政治代價已越來越大,不單點着社會青年怒火,促使泛民議會行為激進化,建制派陷於被動,更已蔓延政府至內部管治團隊,負責實務、推動政策之常任秘書長、資深政務官均認為梁主事下政局不可為。泛民、社運激進化,因有梁「加持」,不單冇人批評反而會有票。

這殘局拖多一個星期也嫌多。

原刊於蘋果日報

發表意見