立場新聞 Stand News

誰更暴力

2019/7/2 — 16:31

先不說乜陰謀論乜請君入甕,九成九應該係嗰個何律師昨天搞個撐警會太嘔心太核突,鼠王元秋太醜樣、阿B又無端端濕身賣腹肌,班樣衰到極的撐警叔叔嬸嬸又當街打人又吐口水又 lur 肺炎濃痰,班阿sir稍為識分好醜都冇理由要班牛鬼蛇神撐,寧願真係執行專業克制,警示充分,至少今日沒有針對記者沒有句句老母。結果他們要清場,亦非常順利,警察正常執法,市民亦會尊重明白。看地鐵站職員開閘放人,會明白每次抗爭可以化險為夷功成身退,係要每個單位都有人願意內心良知覺醒。我們要有希望,警隊內亦有明理之人,會檢討每次行動,慢慢影響番大家。

講真班細路一向好負責任,出得來衝有預被捕被打,但係真心要令差人都要明白,年輕人係唔滿意政府而非挑釁任何人,真係要打要射膠彈都應該鬆半手。今日細路真係尤其勇猛,花成兩個多小時先砸爛幾塊玻璃,都算立法會建造時落足材料。見到他們無視立法會議員勸阻硬闖,個心其實亦唔舒服,尤其知道他們有人打算拚命,更非常憂心他們俾人打得太甘,甚至正面衝突導致人命傷亡。

再諗深一層,班細路係躁,但係從來冇見佢地毆打無還撃之力的建制派議員,佢哋人多勢眾時俾保守街坊臭罵亦只係笑笑口讓路。呢點好重要,佢地行出來永遠挑戰權貴,冇話恃人多欺負人少,亦無傷害平民身體,就算有同伴偶爾過火,永遠有其他同伴勸阻。入到立法會係有噴漆,文物和兒童刊物一概不破壞,飲汽水都識自己放錢。唔似阿何律師請埋嗰批面目猙獰之廢老輩,一見有三萬人就意氣風發皮質醇升高,成班喪屍咁恃人多就圍剿少男少女,又罵人做雞又攬人落地又扯眼鏡又撥泥又句句老母。我真心認為,講暴力班廢老比後生仔更暴力更獸性十倍,亦未見過所謂撐警所謂家和萬事興係會咁挑撥離間。

廣告
廣告

發表意見