假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2019/8/9 - 22:54

講冇建樹,夠你林鄭?

林鄭月娥記者會

林鄭月娥記者會

中共同港府近日加強攻勢,日日開記者會攻擊示威,但狗口長不出象牙,只識鬧人搞壞經濟同賴外國勢力,對於依個局面如何自己有份造成,隻字不提,應該話唔敢提。

最新,講過 N 次會學習謙卑同溝通嘅林鄭,直頭鬧示威者對社會冇建樹冇 stake,所以搞破壞。又嚟依種有貢獻冇貢獻論?第一邊個話反政府的人冇貢獻?多場示威同罷工都有各行各業,無論法律界、醫護界、交通界、金融界、公務員參與,甚至影后同前高官都有呀,你敢話佢哋全部都冇貢獻?第二,有貢獻先有權出聲呀?咁不如搵班富豪治港啦,佢哋貢獻得多 GDP,其他人貢獻就少吖嘛。仲有幾時取消體育界、漁農界議席呀?第三,其實正正係年輕人太有 stake,先咁緊張香港。班年輕人未來五六七十年都要係香港過世㗎,點會冇 stake 呀。已經未同你講 2047 添啦,你班老嘢根本唔夠長命唔需要驚,又或者揸緊外國護照所以唔洗驚。

講開又講,最冇建樹咪你班親中派,尤其你林鄭囉。回歸廿年,治港無方,各類深層次矛盾無解,民心離國家越來越遠,都唔肯認自己有錯,一味賴咩識用 TG 就係外國勢力操控。律政司帶頭犯法,財政司就開劏房,仲有個政務司就真係做過咁多年官都冇人知佢有咩建樹。

廣告

不過都唔夠你林鄭有建樹啦,成件事個元兇就係你,你仲好意思話人搞破壞,最破壞香港咪你囉。唔只逼出香港史上最大型反政府運動,又搞到成個禮崩樂壞警黑合作,仲有響中共建國 70 周年前夕同中美貿易戰之中為國家添煩添亂,邊個夠你建樹多呀?考第一添呀。其實你只要一句撤回送中或者獨立調查,局勢立即緩和,示威者起碼即刻少一半,暴力行為即刻減少。咁簡單就可以幫到香港嘅嘢你都唔做,學咩人講建樹呀你。

 

作者 Medium