立場新聞 Stand News

講吓清真寺同伊斯蘭教

2019/10/21 — 10:23

作者製圖

作者製圖

我自己對宗教有興趣,亦都經常去伊斯蘭教國家旅行,我諗我去過至少都有二十個國家上百間o既清真寺。今日大家都講清真寺,我都分享少少見聞。

1. 首先,清真寺英文唔係 Temple或者 Muslim Temple,係 Mosque,讀音好似「mask」或「morsk」(分別係美國發音同英國發音)。除咗 Mosque 之外,亦都有啲叫做聖陵,英文係Holy Shrine,入面會有一啲先知或者重要的宗教人物o既陵墓。好似黑警咁叫清真寺做 Temple 會俾人笑o架~

2. 世上有四分一人口信伊斯蘭教,而伊斯蘭教亦都分佈喺亞、歐、非幾十個國家,當中有分遜尼派同什葉派同埋好多唔同支派,所以因應地域、國族、文化、支派、甚至大小,各地清真寺亦有所不同,不能一概而論。

3. 首先講男女。有人話女人唔可以入清真寺,呢個講法並唔準確,因為女人都要去清真寺朝拜,唔入得點朝拜呢?清真寺一般有幾個做法,有時會分兩個建築分別俾男女信眾;有時會將個堂中間間開,一邊男一邊女;有時就可以男女混合使用清真寺空間。如果真係有清真寺只俾男性進入,咁通常社區內都會有另一個空間俾女性去朝拜。

4. 衣著方面,各處地方各處例,不過一般嚟講,除鞋同女性包頭係基本,而女性穿著亦唔可以過份,短袖有時都OK,但小背心短裙熱褲呢啲,就通常都唔可以。有啲清真寺會要求女性著罩袍入去,通常咁要求的都會有啲罩袍借俾你用。另外有啲清真寺入寺前會有地方俾人洗腳,洗乾淨先入去。

5. 伊斯蘭教唔俾繪畫真主同先知,所以清真寺唔似教堂咁入面又雕像又畫又盛,清真寺其本上係得上面有燈下面有地毯,信眾喺地上做禱告,所以清真寺入面亦冇櫈。而由於伊斯蘭教聖地係沙地阿拉伯麥加,所以信眾喺清真寺入面都係向住麥加朝拜。

6. 外觀上,清真寺最易認就係有「宣禮塔」,用途係廣播提醒信眾係時候去朝拜。宣禮塔多少同清真寺規模成正比,越多宣禮塔就代表規模越大或越重要;尖沙咀九龍清真寺就有四座宣禮塔。而世上最多宣禮塔o既清真寺係麥加o既大清真寺,有七座宣禮塔。

7. 呢個星期南亞同伊斯蘭教突然變成咗運動焦點,我之前都有啲擔心,但係結果係令到香港華人同少數族裔 connect ,多啲了解多啲互相支持,可能係呢段時間其中一件最令人開心o既事。HKer not defined by race,不論膚色不論宗教,只要愛香港,都係真手足,真香港人!

作者 Facebook

廣告
廣告

發表意見