立場新聞 Stand News

識投,緊係要投…

2016/2/24 — 13:32

圖為立法會新界東補選候選人簡介。

圖為立法會新界東補選候選人簡介。

利申, 新東補選我會投俾7號。 但係我更加覺得識投,緊係要投俾自己鍾意個位。

作為候選人, 應該有責任去宣傳自己政綱, 自己理念, 令到人Buy 你, 認同你。 但係我唔明嘅係, 點解最近有好多論調認為為左保住關鍵一票, 就要將所有票源集中於泛民候選人?

我唔明點解要爭取嘅中間選票, 會係激進民主versus溫和民主, 而唔係建制versus民主?

廣告

我唔明點解大家好似放棄左令支持建制嘅人去認同民主理念, 而則重於within民主派內不同方向嘅討論?

我唔明點解大局為重就可以override選民嘅真正喜好?

廣告

難道要向所謂沉默的大多數拉票嘅做法已經不存在?

難道我地已經冇信心去令香港人再覺醒?

難道對於泛民來講, 候選人本身嘅質素反而係次要?

如果係咁, 我仲會唔會相信泛民有魄力去繼續爭取民主? 我仲會唔會相信你地真係希望尋求改變? 點解唔係擴大票源, 做大個餅, 而只係於現有票源內分餅仔?

提出呢種拉票策略嘅人, 我真心, 真心, 真心希望你地唔係泛民嘅領袖。 每個人都有自己嘅agenda, 都想維護自己利益, 或者獲得更多利益, 所以有人會入民建聯, 所以有人會選擇離開泛民後提出自己所謂嘅中間路線。 或者你目標為本, 或者你太懂政治, 或者你有其他原因。 但係你地可唔可以有小小智慧, 包裝得好小小? 點解未反轉豬肚, 我就已經聞到有屎味?

我希望, 當你地埋怨其他人唔以大局為重, 或者埋怨港豬含淚乜乜乜嘅時候, 唔好忘記我地作為選民, 其實最想要啲乜。

 

Action Accountants 進步會師 facebook

發表意見