立場新聞 Stand News

警察有必要晚上 8 點幾開始咁急衝入沙田正街,入埋商場掃人嗎?

2019/7/15 — 9:58

真係有必要係晚上8點幾開始咁急衝入沙田正街,入埋商場掃人?

首先係居民智慧:「(你班差佬)走左D人就會散」。越唔走,示威者氣氛越緊張;其次係黃昏起,示威者已一路往後退,叫你比條路線,確保要走既人可以走,又唔肯比,有警員話見唔到後退,最後仲要被老點,話沙田街市旁邊條路可以走,點知被包抄。

清十字路時,差佬已經有人上好運中心平台清人。係之前已有人掉野落黎,理論上,平台隊伍唔同地面部隊同步,只會令到地面部隊面對上面掉野落黎風險。誰知地面部隊急於建功,成班防暴過左十字路,忽然奮起跑入正街,結果咪平台一路掉野落黎。

廣告

之後班指揮官放幾十防暴入商場清場。首先係全無必要,有無阻你馬路?無;商場有無野受破壞?見唔到,商場亦表明無報警。但你放幾十個防暴入去成千示威者的商場,客觀效果等於送班前線暴露於被圍、甚至係重複更多人係2、3樓掉野落中庭的風險之中。

無論係警員定示威者受傷的地方,都主要係商場的衝突內發生。仲要一度連沙田站都想擋住唔比示威者入,你班指揮官究竟諗乜?因為你班高層搞埋垃圾戰術,推你堆前線警員去死之餘,更加造成極無謂的衝突,有老人家同小朋友無啦啦俾差佬兇。當日71進攻立法會,當時警方話:「立法會範圍僅200至300名警員,考慮到示威者眾多及上述因素,亦憂雙方衝突「會牽動其他示威者情緒」,最後現場指揮官要求暫撤。」個陣連守都驚唔夠人,而家勇到唔夠人都攻?高陵勿向,背丘勿逆,佯北勿從,鋭卒勿攻聽過未?

廣告

我諗無人想任何人受傷,不過我唔能夠忽略,製造沙田衝突的,係種種荒謬安排。推三十幾個年輕人係大會堂拉佢非法集結,除左盲目洩憤,完全無法理解。

當然更背後的問題係呢個政府一路龜縮,繼續任人民鬥人民,那是人人皆知。

發表意見