林彥邦

林彥邦

傳媒人,涉足報章、電台、電視,沉迷文字,喜愛說故事,希望成為擅長說故事的人。

2019/7/13 - 23:06

警方的無差別攻擊

今日上水,又有一批行家中椒/中棍/被推等等等。

公道講,今日警方應該真係唔係針對記者攻擊。因為警方係無差別攻擊,警棍可能會留手,胡椒絕對係草地灑水咁周圍噴,記者/示威者,企得前、一定中。

事發大概下午 5 點幾,示威者佔咗上水廣場同火車站中間段路,警方防線一路退,示威者就一路進,去到一個位,雙方對峙,范國威嘗試上前調停,叫警方俾時間啲人退,警方只係不斷重覆,「啲人係咪你叫嚟,係咪你負責。」

廣告

最終似乎協調到示威者退後,當示威者一退後,警方就衝出防線,打/拉/噴,將示威者制服在地,將條防線推前大約 200 米,示威者/記者受傷個案大部份都係嗰段期間發生。

離奇係,警方推前 200 米之後,慢慢退返原位,然後,全部撤走。

從一方面呢個可能係戰術?調轉講,個一輪噴/拉/打其實完全無必要,既然本身打算完全撤退,推前 200 米打一輪人有咩原因?

然後上水入咗幾個鐘無警時份,到夜晚8點,警方清場時絕大部份示威者都散曬,地面清場無咩特別,天橋先係重點。

好危險嗰單幾乎飛人,我見唔到起因唔敢講,反而想講講其他。

話說社工,經常去前線講野位女社工,今日又係清場時候係上水廣場天橋,佢一如平日叫警察冷靜,換嚟係一個白衫警察不停話佢「非法集結」,社工叫佢唔好咁激動,佢就叫咪話「你唔好再煽動示威者」,結果有個擺明行過阿姐幫口,話「我係度住幾廿年,示咩威者,onx9(好似係咁上下)」,結果換咗另一個警察拎咪,大家就相安無事,而好似好激動個白衫,無認錯應該係旺角好激動個位。

警方仲一度封晒成條上水天橋,防線推到近火車站,上水廣場、名都廣場都俾入唔俾出,行過聽到有藍絲都抱怨,「使唔使呀,我都支持你。」

綜合講,唔好判斷警方人員係咪太激動之類,只係有好多行動,動機好難理解,驅散又驅散唔到,到底你係想啲人走,定唔想佢地走?可能有人會覺得係洩憤,或者特登打一輪人先,都不無道理;至於每次清場都當眼前所有人係示威者、敵人,早就見怪不怪了。