立場新聞 Stand News

讀三國千祈唔好讀過龍

2018/7/28 — 18:10

電影《赤壁》宣傳片截圖

電影《赤壁》宣傳片截圖

聽講一哥叫人讀《三國演義》。讀三國夠架啦,千祈唔好讀埋晉朝。晉國 280 年統一三國,311 年就五胡亂華洛陽淪陷玩完。明明 GDP 第一、大一統、不搞民主自由、不硬搬西方一套、領導人終身制,結果仲弱雞過三國分裂時是但一國。蜀國都捱到 42 年呀大佬。

不過就算淨係讀三國,都要小心唔好讀過龍,睇透以下幾點:

1. 中國人自古最中意內鬥。由十八路諸侯倒董,袁氏三兄弟死到臨頭,到蜀吳合作失敗都係。爭權、爭功、爭上位、爭捉鬼,永無間斷。

廣告

2. 投降派又係歷來都多。無論孫權軍(周郎除外)、劉表軍、劉璋軍,你講得出都係。最經典應屬張松,唔止騎牛搵馬,仲送埋攻略畀未來老細,簡直人辦。

3. 閹人又係多。開頭有十常侍,後尾有黃皓。好多人為攀附權貴不知幾樂意做閹人。

廣告

4. 而且多數老闆都中意用閹人。親小人,遠賢臣,何止後漢先係?

5. 精明老闆,到老都多有糊塗。曹劉孫邊個走得甩?

6. 奸角上位容易,忠角多捱到死。有啲人唔知點解一出場就已經係高官,相反趙雲之流真係捱咗不知幾耐先升到高位。

7. 跟老細跟得耐都唔擔保可以平安退休。望下荀彧。

8. 官二代富二代又係有優勢。靠家姐妹妹嫁個有錢人又得。何進是也。

9. 人無完人,叻如諸葛亮司馬懿都有失算之時。所以有啲人舊時成功過一次就成日吹威水史,sorry 一次成功唔代表你以後次次都啱。

10. 躬耕於南陽不求出位的宅男可能先係叻人,相反一日到黑認小學考第一嗰啲……正是有能力又唔出嚟,冇能力又爭住做。

11. 宣一次誓就跟足一世,得關二哥做到。不過就算關二哥都試過信錯 fake news 上錯賊船,轉過老細一段時間。

12. 延伸去諗,有啲人宣過誓效忠事頭婆,跟住又宣誓效忠共產黨,可能臨尾就香都係會拎返英國護照安心啲。即係啲犯婦人呀,薑蓉呀,大口狗嗰啲呢。

13. 勿以為投降輸一半當冇事,好多諸侯投咗降跟住都冇咩好收場。

14. 蜀國只一省分裂勢力,卻是天府之國,經濟文化發展蓬勃,如非掛住反攻大陸耗損人力可能捱得仲耐。

15. 分久必合,合久亦必分。國家好似好威,轉頭又可成空。魏滅漢、晉滅魏、五胡亂華。咩叫正統政府,自古以來乜乜乜,唔好太認真。

p.s. 搞社運溝女可能真係有,你睇劉備老婆有增無減。

 

原刊於作者網誌

發表意見