立場新聞 Stand News

【走為上策】請廣傳!見到水炮車,第一時間要走!

2019/8/1 — 13:20

資料圖片:水炮車進行測試(Hong Kong Police Force片段截圖)

資料圖片:水炮車進行測試(Hong Kong Police Force片段截圖)

聽講,水炮車嚟緊好快就要出。

我本來仲打算詳細咁寫,睇睇自己個時間表,我就知道暫時無咩希望。所以我寫咗最重要嘅訊息畀大家先。

見到水炮車,一定要即刻走!
見到水炮車,一定要即刻走!
見到水炮車,一定要即刻走!

廣告

一秒都唔可以猶豫,即刻離開,同架車保持最少七十米距離!

本來我以為大家都知道水炮車有幾危險。但係我發現有啲網絡上嘅朋友,可能對重型車有研究,同大家分析水炮車嘅構造同弱點,上網查,發現好多人 search「水炮車 弱點」呢啲關鍵字。

廣告

水炮車不可怕,以為水炮車有弱點你可以攻擊,呢個諗法先可怕。

我呢個過氣義工消防員,都叫對消防車有少少認識,淨係依據我咁少嘅認識,就已經足以令到我講呢一番說話。唔係恐嚇你 — 無錯,水炮車係貨車改裝,未必好穩固,水箱大細亦唔足夠喺無供應嘅情況下長期落場。

不過,唔好諗住可以好似打機咁打大佬。

水炮車,香港警察唔講水壓幾大,等我話俾你知:救火又好,射水炮都好,規格好多都上到 20 bar。

上煙帽隊 training 嘅時候,開條喉,10 bar,都要兩個人紮哂馬先捉得住。驅散人群,10 bar 夠有突,而且淨係射下半身,都已經無可能企得穩。

依家問題係:個炮可以任意瞄準,有得開足 20 bar,你覺得克警會唔會依照 10 bar,射下半身呢個指引做嘢?呢個問題,求其搵個三歲細路哥都識得答你。

依家荷槍實彈雷明登鬧市之中都夠膽出,攞正水炮車呢個「非致命性武器」嘅牌,仲唔開到盡嚟顏射你?

當洗個面囉。

如果你係咁諗的話,咁請睇下圖。

有人講過,水炮車韓國殺過人,我呢個留德華,講德國嘅例子。

Stuttgart 21 嘅示威,德國警方出過水炮車,射中一個叫 Dietrich Wagner 嘅工程師。結果點,一張圖勝過千言萬語。佢依家得返一成視力,即係,盲咗。

德國警察,本來都稱得上係真.克警,但今次真係過咗火,之後都俾人告,法院裁定當日清場行動用水炮車違法,最後政府賠咗足足一百萬港幣俾佢!地方警局負責人被控疏忽導致他人身體受傷,要俾巨額罰款!

喺香港,水炮射死人之後會點?
「警方一貫保持克制,依照指引使用水炮驅趕違法示威者,對有人傷亡表示遺憾。」稿我都幫你諗埋啦!慳啲啦你!

抗爭,唔係打仗,一時三刻,唔會打得贏。

不受傷,不流血,不被捕!保存實力,先有翻盤機會呀!

 

作者 Facebook

發表意見