立場新聞 Stand News

越爛越上位

2016/2/1 — 7:24

李國章(無線新聞截圖)

李國章(無線新聞截圖)

年尾流流大家都想安安靜靜過年,但689就是有這個能耐,唔想畀大家好過。雨傘運動後年多以來,他仍堅持以鬥爭為綱,製造港獨危機、批鬥年輕人、散佈陰謀論,事實上2015全年並不好過。結果2016年開波就由闖將李國章掀起序幕,佢做主席大家都知校委會已經成為火藥庫,每次會議定必引發衝突,而李國章就藉機撥火挑機,將矛盾扣上「公民黨陰謀論」,升呢兼發圍。

香港之亂局,令人痛心,追源溯始,在於管治能力大倒退。建制中人胡言亂語,美國政治修辭稱之為「phony tough talk and bluster」,內地就叫「亮劍」,即大大聲扮強硬兇人,奧巴馬日前以此嘲笑共和黨初選人馬。以往兇狠及泛陰謀言論早已存在,閂起門就痛罵泛民、長毛、肥佬黎及夏千福來發洩,捕風捉影,但又無耐心去了解政治的細節,一如《城市論壇》觀眾席的維園阿伯。以前呢種維園阿伯式言論,之所以冇出街,係因為大家仍然知道公職身份要自重,更重要是考慮政治效果。

?家並非李國章把口特別衰,在當年他出任教統局局長推動中大吞併教院一事中,大家已可見端倪。問題是以往約束力不單止消失了,今日掌權者反過來鼓勵Bluster行為,於是「洗頭艇」、「學生吸毒」等極端言論就如猛鬼出籠。這種口不擇言、不顧身份及後果的言論,即使引起批評,但由於動機正確,又勇於出拳亮劍,一棚人小圈子互相聲援,不單唔會受批評,而且會得到鼓勵。大陸歷次政治運動最終陷入災難結局,推波助瀾的就是這種寧左勿右心態。

廣告

橘逾淮為枳,英治時代同一班建制派,因水土不一樣,思想行為也有別。同樣來自李氏家族,李國寶就以紳士姿態出現,與人為善,同李柱銘、夏佳理、田北俊一班人談笑風生,每次見其他議員發言完畢,就立即豎起拇指,頻頻稱讚very good, very good,成為口頭禪。背後因為港英管治要求不同,希望本地政治人樹立文明形象。九五年地盤判頭曾健成循新九組當選立法局,總督就送他一條乳牛黃領呔,囑咐他出席大會跟隨dress code。如果港英建制中人郁吓就口出惡言,一早就放入雪櫃,只因爛仔形象最終影響的是公眾對整個港英建制的觀感,更重要是爛仔囗賤會損害港府管治能力。

好多人唔明點解香港沉默多數唔去批評學生激進行動,道理一字咁淺,當建制政治形象惡劣時,即使對方行為過激,大家只會選擇袖手旁觀。香港中產主流保守、怕亂、信權威、講秩序,先天上本來就係政府盟友。問題是當政府喪失文明形象,權威低落時,大家認為唔值得幫。香港人有冇是非黑白判斷力?當然有!寒流大帽山惡女登山事件證明,唔係用自由之名挑戰警察就一定有人撐,但當建制政客劣質化,喪失文明形象後,大家會問:「政府咁衰,點解要幫佢!」

廣告

英治時代人人向上扮紳士,今日人人向下做爛仔,越爛越多公職,試問管治又點會成功?人變了?還是水土變了?李氏家族就是上佳的個案研究。

刊於蘋果日報

 

發表意見