立場新聞 Stand News

足球,從來不只是運動那麼簡單

2015/9/16 — 18:13

巴塞與皇馬、西班牙球迷的地方主義,只是足球與政治上的冰山一角。 (資料圖片)

巴塞與皇馬、西班牙球迷的地方主義,只是足球與政治上的冰山一角。 (資料圖片)

「夠啦!可唔可以唔好成日將政治拉去足球,好撚煩呀!」

平日不怎說髒話的阿明忽然破口大罵,看來是最近的足球熱話惹怒了他。

阿明在我眼中,沒十成都有八成是個波牛,英超、西甲、德甲、意甲、俄超、土超、法甲、中超、美職、甚至港超,他統統都會看,100%足球狂迷。若然這句話出於港女,我不怎奇怪,她們不懂足球,不明白足球跟政治的關係,情有可願,可是出於阿明口中,卻是莫名其妙。

廣告

「阿明,你唔係鍾意巴塞嘅咩?」
「係又點呀?」
「咁你知唔知點解巴塞同皇馬咁大仇恨呀?」
「知又點呀!足球還足球,政治還政治!唔好拉埋一齊黎講!我只係想將心情投放在足球場上嘅角力,好好地欣賞一場足球比賽!」

說到這裡,阿明言語開始有點偏激,一種火藥氣味四處飄散。

廣告

「阿明,我睇波都係欣賞球賽,但有啲野都唔可以忽略,你有冇諗過點解每逢國家打吡,皇馬同巴塞都好似打仗咁激烈,場內場外都唔放過對方,非你死便我亡?唔單止係因為足球力量,更係沿於歷史.....」

「佛朗哥獨裁呀嘛、皇馬喉舌呀嘛、加泰隆尼亞呀嘛,我知道,但咁又點啫,點解唔可以將焦點放番落足球場上,係都要拉埋政治黎講,你唔覺好煩咩?最近睇香港波都煩到死,下下都拉埋政治講,煩到死。」

「點解煩呀?當你知道點解巴塞隆拿死都要ko皇馬背後原因,你就知道原來當中係有段故,從而知道點解落到球場,班球員會打生打死,一切唔只係為足球咁簡單,點解最近港隊咁多人支持,唔多唔少都係有種政治因素係入面,你了解過背後原因,你就知道足球係同政治息息相關.....」

「我理得佢背後有咩原因,落到場我只會睇佢踢成點,我只覺得足球事,足球了,要講政治,就用番政治手段處理,唔好將政治拉落足球到,足球唔係政治工具,唔好污染足球,屌那星,真係好撚煩。」

此刻,阿明已經忍不住又再爆粗,而他的臉,已紅到像關公,只欠一把青龍偃月刀,不然他應該想將我碎屍萬段,但我始終忍不住要繼續說下去。

「阿明,你知唔知巴塞嘅座右銘係乜?」阿明正要開口之際,我已搶先他一步。

「係『More than a club』,足球,唔係你腦海中咁簡單。如果有一日,你見到巴塞隆拿無得踢西甲,你唔好問點解,因為係關於政治,你唔會想知,咁樣會好打擊你嘅心靈,同埋你試下去魯營睇國家打吡時叫巴塞球迷唔好咁政治,睇下佢地打唔打柒你?」

說罷,我頭也不回便離開,但我感覺到身後的阿明已經慶過火屎,正要搵刀劈我,但我已不理,我只覺得那刻自己好有霸氣,但實際上,我驚到瀨屎。而其實講到尾,政治,也是足球場上的一部份,即使如此,都不會減弱足球場兩者之間的角力,仍然是足球事,仍然是足球了,甚至會令球賽激烈程度增加,飯後餘話也變得更豐富。不是說非政治不可,但不能否定他的存在,始終,很多東西很難單一看待,因為世上所有的事,都是相關的。

足球,可以神聖得像一種信仰,也可以平凡得像一場競技,但同時又會複雜得像一場政治角力,無論如何,都不會只有一種形態,因為足球,從來不只是運動那麼簡單。

所以,不要再說足球與政治無相關,說出來,只會被人恥笑。



ps:巴塞與皇馬只是足球與政治上的冰山一角,要睇、要了解,網上還有很多,例如曼聯 vs 列斯聯、多蒙特 vs 史浩克04、英格蘭 vs 阿根廷等等。

原刊於足球說故事

發表意見