立場新聞 Stand News

身冇屎怕咩逃犯條例

2019/3/11 — 17:25

作者製圖

作者製圖

《逃犯條例》修訂,建議容許移交逃犯返大陸。率先反對嘅,多屬黃絲,因為反對係基於對法治和大陸政治嘅基本認識。去到後尾,連本地商界都反對,佢哋雖然講嘢好小心,話唔係反對修例不過要剔除咩經濟犯罪嗰啲,好明顯,係基於自己好可能成為受害者。結果,譚惠珠雖然死撐話大家唔使擔心,但補咗句「絕非中央要求」。呢句話真係可圈可點,可圈嘅係,佢表明呢單嘢唔關中央事架,美國唔好乘機抽中央水,有咩事係特區政府自己攞嚟賤;可點嘅係,呢句嘢暗示咗,如果係中央要求,特區政府死都要做,即係高度自治係一個空話(其實全世界都知道了),但中央依家冇落柯打,你特區政府見勢色唔對,可以縮沙。

正如藍絲名言:「你行得正企行正,身冇屎,怕咩惡法?呢個世界邊有惡法?邊個叫你唔守皇法?」咪係囉,我就唔明點解,啲藍絲五毛唔以此群起攻擊商界,叫佢哋挺起胸膛做人,夜半公安敲門也不驚。

咁查實點解商界咁鬼膽心?好簡單,因為身有屎囉。老實講,即使喺香港,都唔知幾多商人犯緊法、走緊法律罅,不過香港向來有良好法治,冇證冇據就郁唔到你嘅,真係郁你都有大把替死鬼。但係呢,如果啲商人喺大陸有生意呢,嘿嘿,只要你識一啲喺大陸做緊或做過生意嘅人,問吓佢哋,喺大陸如果正正常常奉公守法,睇吓有冇人畀你做生意?生意越做得大,越有唔見得光嘅嘢喺背後,呢啲就係潛規則,而好似大陸呢啲法治水平咁落後嘅極權地方,潛規則真係多如繁星。如果你唔明,攞套《樹大招風》嚟睇吓,你就明白連賊王想做生意,都要帶個花瓶過五關斬六將啊。

廣告

仲有一樣,就係香港好多商人,都鍾意喺大陸包吓二奶,好似身份象徵咁。但喺大陸重婚罪係犯法喎。再講,唔包二奶,做得大生意,出得大場面,大老闆要社交應酬嫖賭飲吹少不免,如果唔係向西就唔會寫「東莞的森林」,但咁喎,嫖妓喺大陸從來都唔係合法。

當然啦,當國家要重用你,行賄吓逃吓稅嫖吓妓呢啲濕碎嘢,唔會有人理;但有一日,有人睇你唔順眼,呢啲嘢就全部變成嚴重罪行;即使國家仍然重用你,不過權鬥緊,你就成為犧牲品,拉你唔係想整你,係整喺背後撐你嗰個啫。咁逃犯條例修訂咗,無嘅,好似范冰冰咁,無端端消失一排囉,中間唔知受幾多苦囉。如果你係富豪,但冇范冰冰咁靚,真係傾家蕩產你都未必走得甩;如果你係普通商人,咁無限期行政拘留你,調查一兩年都係好正常嘅做法,到你出返嚟,你屋企早已生活拮据——有錢都攞晒嚟派,以保你唔畀人折磨死啦。

廣告

講到呢到,唔知嗰啲中小企小老闆同埋藍屍阿伯,會唔會個心慌一慌——哎唷,我都有包二奶同嫖過妓。放心,中共對螻蟻係冇興趣嘅,搞你,你屋企又冇錢畀,搞你做乜啫?所以你哋可以放心支持,拉橫額去政府總部力撐修訂,並用最惡毒的粗口鬧田北俊呀、自由黨鍾國斌呀、經民聯呀嗰啲提出過憂慮嘅商家,因為呢啲人基本上曲線侮辱國家,覺得國家係唔識法律嘅,係唔識依法施政嘅,係亂嚟係落後嘅。喺呢個中美鬥得要生要死嘅時刻,呢班人咁樣加把腳幫美國商會,形同叛國,所以本人100%支持你哋打壓漢奸洋奴賣國賊。

 

發表意見