立場新聞 Stand News

民主派辛苦爭到三百個位,究竟為乜?除了More Evil 或 Less Evil ,還有其他可能嗎?

2017/2/2 — 7:59

林鄭月娥、曾俊華

林鄭月娥、曾俊華

「 .... 目前為著lesser evil要勸選委捧曾的意願,存在不少未確定的假設。到底大家想的lesser evil有幾less?到底中央最後屬意的,真是2.0,還是大家心中的lesser evil? .... 」

民主派選委林芷筠:《給還自稱作民主派支持者的所有人

除了是More Evil 或 Less Evil ,還有其他可能嗎?

只想搞清楚,在現在這個局之下,最終结果除了是More Evil 或 Less Evil 之外,會不會有另一個可能性?泛民那三百票,可以創出另一個選項嗎?如果點做結果都只係 More or Less 的問題,又不忿一定要在策略上盡力做就個 Less, 又諗唔到點樣可以令到在 More or Less 之外,可以爆個乜Q人出嚟做特首,咁從一開始便根本沒有需要參與選委選舉這個小圈子遊戲。

廣告

如果要不斷質疑,人人都可以話:「你咪又係小圈子,得嗰廿零萬人」。所以,我認為現在要立足於這個對民主支持同道注定是殘局的局來打下去。除非選擇棄盤,more evil, less evil, 關我乜事,洗手不幹!

John Tsang 唔一定係 Lesser Evil, 如果泛民依家就 endorse 佢話氣氛唔好就唔會重啟政改這個講法,佢隨時有可能會成為 More Evil,正中共產黨下懷。

廣告

所以,我認為民主派中人唔需要咁快表態,梁家傑、胡志偉等,何須這麼快就表態要為曾俊華抬轎?如此冷落胡官,就更加令人失望。其實,現階段可以睇定D先,盡量在未來一段時間嘗試摸清中共的底牌,這個可以預見是很不容易的。 中共及其爪牙會以不同的訊息來混淆大家、分化大家。到最後,始終有一個 Evil 會成為特首。問題是大家會否自動放軟手腳,任由 More Evil 順利輕鬆上位,還是要明知輸梗,都要打到最後,希望有個冇咁 more 的,希望以後的仗好打一點。就算個 More 真係勝出,都要佢冇咁馨香,都要令佢低票、低比率當選。

如果這一點希望都冇,咁即係做乜都冇用,早早就應該移師棄陣了。這是你們出這樣大力氣搶位的原意嗎?以為給你的票的人是這樣想嗎?

*   *   *

「 .... 在lesser evil與務實路線之間,筆者始終認為各位爭取民主的香港人,現在不應是去想支持哪一個候選人,我們應該思考,將來面對新特首時做,如何仍然有能量,繼續爭取民主,令香港人最終能夠當家作主,這才是重中之重。」

民協副主席何啟明:《民主不是爲了 lesser evil

要喺這個玩法之下,令選出的必然變成More Evil。

去到今日咁嘅局面仲要返轉頭?咁即係點?不如呼籲民主派300+選委即時退出選委會以明志。未來兩個月,大家就可以樂得清閑,乜Q選舉都唔使理。咁好有可能會變成有為高官對葉劉,就算比John Tsang入閘與有為高官對決也無妨。反正乜嘢 Evil 都只係 Evil。總之到時,有為高官就會以800票以上當選,佔有效票數九成以上。到時好似閣下呢啲離地泛民就可以繼續話特首冇代表性。(乜你以為多咗三百幾票一齊玩,個特首就會突然變得好有代表性咩?)然後大家就可以繼續舖舖衝佢,又衝足五年,跟住遊戲又重新開始。

泛民選委參與這個遊戲,唔使奢望可以造王。但起碼令北京欽點唔可以咁輕鬆,等中聯辦要加派人手打電話,起碼做少啲其他衰嘢。就算最後係欽點成功都冇咁馨香。泛民選委參與,唔係要賦予成個選舉更大的認受性,而係要凸顯選出嚟嗰個係幾咁冇認受性。就算係白造,俾個 More Evil 跑出,佢都冇咁眾望所歸,以後五年,講句說話都冇咁口響。點解要話思歪係689,重要叫足五年,就係要不斷提醒全世界,佢只係小圈子,佢絕對唔係眾望所歸,就算係只有千二人嘅小圈子,佢都只係小圈子中嘅小圈子。明唔明?

就算俾個 More Evil 選出,都要佢不斷面對689這個魔咒。呢個才是泛民及公民社會與這個 Evil 在未來五年繼續玩落去嘅起步點同基礎。如果唔覺意俾個 Less Evil 跑出 (當然可能性極低),香港未來五年可能冇咁辛苦,變數可能亦都會大一啲。

真係無辦法理解,點解有人會認為乜都未做,就要自己棄械投降。當初咁辛苦爭三百個位返嚟,究竟為乜?唔客氣講句,呢啲正式係返祖思維。

發表意見