立場新聞 Stand News

近期必睇神片:看到結尾令全世界震驚的《戰狼》

2015/8/11 — 10:45

神片《戰狼》海報

神片《戰狼》海報

好少睇大陸樣板戲,睇都係當笑片睇。今次拍檔Tommy Sir話呢套《戰狼》必睇,本來之前我已經睇咗一半頂唔順冇睇落去,但佢話個結尾唔睇後悔,所以睇埋佢。果然真係冇介紹錯,真係冇得頂。

簡單黎講,呢套《戰狼》係一套吳京自導自演、解放軍支持拍嘅「大片」。實際上佢係:

TVB飛虎+Top Gun+解放軍樣板戲+抗日神劇 = 戰無不勝嘅人民解放軍萬歲、吳京主角威能萬歲

廣告

下有劇透,但神片沒所謂

基本上呢套戲「亮點」太多,不能盡錄,以下係比較誇張嘅:

廣告

1. 圖中呢個”I FIGHT FOR CHINA”臂章,真係響戲裡面出現,應該係用黎向對手鬼佬僱傭兵表示自己有幾愛國,因為鬼佬唔識中文。

2. 成套戲基本上就係吳京不斷表現自己幾有自信,幾武林高手。佢果種自信個樣,感覺好似我見過啲愛國文章朗誦比賽啲中國小學生咁。

3. 個女主角余男,成套戲好似忍緊笑咁,可能佢真係忍緊笑。

4. 奸角智力會隨著劇情推進時間下降,到接近結局時會由世界聞風喪膽嘅大毒梟及皇牌僱傭兵變白癡。

5. 協力嘅南京軍區派出大量軍機、坦克、裝甲車,好似閱兵咁,但根本同劇情冇太大關係。

6. 同《太平輪》一樣,如果你當兵的話,千祈唔好show張老婆相俾男主角睇,因為你下一幕必死。

7. Tommy兄發現成套戲啲解放軍中槍唔會流血。

8. 成日話「雖遠必誅」--同正義傳媒一樣。網友吐糟問現實世界緬甸邊境軍隊炮轟果敢時打中埋雲南,會唔會雖遠必誅。

亮點中嘅亮點:

9. 吳京應該係鐵掌水上飄,佢踩到地雷,自救方法竟然係打後空翻就冇事!早知你識武功就唔駛打咁耐啦,你一早去徒手撕開啲犯罪份子咪得囉。

10. 咁班國際犯罪份子去中國買賣啲咩?呢個真係俾你估十萬次都唔會估到….
.
.
.
原來佢地搶到大批中國人嘅血液樣本,呢啲樣本可以令敵對勢力了解中國人嘅基因,然後就可以製造出令中國母親生畸胎嘅生化武器!

早講吖!要毒害中國嬰孩,駛乜出動國際皇牌僱傭兵搞咁多大龍鳳?你叫中國人母親繼續食有毒食品、繼續吸霧霾,再將封存嘅三鹿奶粉推出市面咪做到囉。

—————————

呢套神劇式大片響大陸好收得。當中可能有水份,但應該都真係有番咁上下多人睇。我睇住吳京不斷響度好有自信咁扮型、不斷講肉麻到嘔嘅愛國對白,我諗應該有好多人睇到好high,中國好勁!中國萬歲!水上飄拆彈大法萬歲!

 

 

原刊於作者博客

發表意見