立場新聞 Stand News

退保亂局雙打

2016/1/4 — 8:51

梁振英facebook 圖片

梁振英facebook 圖片

退保諮詢之所以搞到社會分化,又係本屆政府的管治特色。本來就應該由勞福局張建宗揸旗,當年彭定康搵惠悅顧問公司寫份諮詢報告,所有數據評估精算推測獨立公正,唔會好似今日自己友互罵互片,而台前推銷者乃副教育及人力統籌司林煥光,屬上位政務官,當年仍然唔怕死,力推有所得再分配功能的老人金,但職位不高,即使最終仆咗,也無損港府權威。本來照抄呢套方法就最好不過,亦係真正處理公共政策之技巧。

偏偏香港特區有個乜都政治掛帥嘅特首,為求短期民望,高調表示會解決退休保障問題,亦無端將退保變成扶貧,由高規格之扶貧委員會負責,並由林鄭揸旗,張建宗靠邊站,而財金系官員及親建制啱嘴形之自由派經濟學者如雷鼎鳴、王于漸、廖柏偉三大御用高手全無角色,本應是長遠公共財政討論,無厘頭變質由扶貧角度傾,自然俾社福界主導,林鄭算盤是單天保至尊依靠政務司自己人周永新教授為政府保駕護航,結果周永新「轉軚」撐全民方案,社會期望因而不斷高升,是為亂局之源。

從政策角度而言,全民退保冇資產審查呢一套是非主流方案,香港獅子山下一代講求自力更生,自己顧自己,只要一講李嘉誠每個月都有四千蚊就火大。至於香港中產根本睇穿將來自己退休靠資產回報,而非工資收入,點會支持全民退保,最好乜都唔搞。大好政策形勢之所以變樣,同美國重返亞洲、勾結外國勢力及肥佬黎無關,全部係由兩個人搞彎。

廣告

689為扮有型,以示有別上屆政府,當日競選時在基層、勞工及房屋政策猛開空頭支票,過骨當選後就諗計點樣求其交差,研究又研究又再研究,為標準工時、取消強積金對沖及全民退保走數找尋下台階。上屆政府一直堅拒重開全民退保討論,張建宗日日俾社福界砌,一樣堅持「三大支柱」,即綜援、強積金及老人金作退休保障制度核心,佢心知一重新諮詢,就等如打開水閘,社運、社福、政客聚焦一齊施壓。

689施政只看表面及短期利益,不計政治後果,典型賭徒心態,唔諗End Game,於是最終變成一鑊粥。為滿足他個人政治形象,社會各方折騰一輪,一事無成,折騰過程中林鄭竟然對周永新作人身攻擊,令社福界內譁然。而在過去二十多年來一直是政府政策盟友的自由派經濟學者,大家唔出聲食花生,商界及專業界唔想沾上政治粒聲唔出。689政府就是有此能耐,製造混亂、製造矛盾及製造敵人。如果現屆政府真正走民粹開倉大派還好,但偏偏走的是偽民粹扮民粹,做場show之後一事無成就諉過於人,這種施政流弊比政治保守遺害更大。政府權威、政策公信力建立要好耐,要破壞?一年就可以死直。

廣告

 

刊於蘋果日報

發表意見