立場新聞 Stand News

【逃犯條例】小店 6.9 紛罷市撐遊行 「團結先可以事成」

2019/6/5 — 20:50

(更多小店 6 月 9 日罷市上街遊,請看最新報道:【名單不斷更新】更多小店加入罷市一天 籲 6.9 上街反送中

民陣將於6月9日發起「反送中」大遊行,多間本地時裝店均宣布當日休業一天。其中位於觀塘工廈的時裝店「Galazy HK」,表明「身為香港人點都要做小小嘢」,呼籲大家一同為香港把關。位於旺角的「FORBRO」亦表明即使只得1%機會成功,「我哋都有責任為自己嘅地方去付出」。

由YouTuber「Galaxyman 仲民」主理的潮店「Galazy HK」,今日在IG貼出6月9日暫停營業的通知。通告指,該店以往除了新年外都會開舖,「但今次無計,身為香港人點都要做小小嘢,希望各位客人體諒我呢個決定!」該店又呼籲大家一齊為香港把關,「團結先可以事成,一齊撐到尾!」

廣告

旺角的「FORBRO」今日亦宣布6月9日暫停營業,稱幾位店主商討不足一分鐘已作出此決定,「直到呢幾日見到不少店鋪都休業一天企出嚟,個感受好重(可能我地都啱啱創業不久),點解人地可以放低一日店鋪上嘅事情,而去企出嚟,我地難道就唔得?試過一次爭取唔到,之後就唔去再嘗試?那怕只得1%機會,我地都有責任為自己嘅地方去付出。」

「FORBRO」的店主又指,該店門市先僅創立約一個月,客人並不多,明白接觸敏感議題有風險,但認為做生意可重頭再來,但修例一旦通過就不能改變:「我地衰左咪重頭嚟過囉,但今次(修例)一通過就唔會有重頭嚟過依四隻字。」

廣告

早前位於旺角家樂坊的服裝店 UTRY 亦宣布,6 月 9 日將罷市一天,店主強調決定是經所有同事商議,又稱「總有事比賺錢重要」,希望同事可不受工作束縛,做他們覺得正確的事。店主又希望透過這行動,懇請大眾關注《逃犯條例》修訂。

 
 
 
 
 
 
 
 
 
 
 
 
 

⚠️《號外》⚠️ FORBRO門市將於6月9日(星期日)暫停營業一天 相信大家都好清楚點解。呢幾日都見到不少店鋪係6月9日暫停營業一天,FORBRO幾位小老闆經過1分鐘都唔洗嘅商討後,就作出呢個決定。 老實講,我地一開始無諗過會暫停營業, 第一:FORBRO門市才剛開1個月左右,我們都希望珍惜每一位來臨門市的客人。 第二:其實早在五年前香港亦都發生過一件事,當時香港人都很團結一心企出嚟表達訴求,我地幾位都係其中一員。但當時估唔到會持續左差唔多3個月,我地幾位亦都由第一日留守到最尾果日,到最後都爭取不到什麼。當時個感受係覺得有時候有啲野唔係話堅持就會得償所願(特別係關係到政治層面)。所以直到今次,就算幾多人話行出嚟,在此之前都認為:「冇用㗎,試過啦,最後都係咩都爭取唔到。」直到呢幾日見到不少店鋪都休業一天企出嚟,個感受好重(可能我地都啱啱創業不久),點解人地可以放低一日店鋪上嘅事情,而去企出嚟,我地難道就唔得?試過一次爭取唔到,之後就唔去再嘗試?那怕只得1%機會,我地都有責任為自己嘅地方去付出。 5年前我哋係以個人身分去表達訴求,今次我地幾個係代表緊FORBRO。作為一個能接觸到大眾嘅店鋪,甚至去到KOL、YouTuber,都會盡量避免接觸政治話題。更何況FORBRO門市先剛剛創立一個月左右,客人已經唔係多,仲要去接觸一啲咁敏感嘅話題,心諗唔係想執笠呀你地。我地咁樣做係會有風險,但反觀同行有啲followers幾萬,影響力比我地大嘅多的是,人地風險唔會更多?我地衰左咪重頭嚟過囉,但今次一通過就唔會有重頭嚟過依四隻字。 我地清楚FORBRO果幾百個Followers有大部分都係學生,我想大家如果睇到呢條信息,希望可以話到比身邊唔太清楚嘅同學仔知,今次呢個議題係絕對會影響到你地呢代,了解多少少,為自己,企出嚟。 如有不便之處,還望各位見諒🙏🏻 FORBRO #當日WhatsApp維持正常運作 #那怕只得百分之一機會 #都要用盡百分百嘅力量 #企出嚟 #6月9日 #銅鑼灣見

旺角煙廠街九號興發商業大廈22樓03室,售賣歐美日街牌(@forbrohk)分享的貼文 於 張貼

發表意見