立場新聞 Stand News

【逃犯條例】計計數,不如同班商家佬攬炒

2019/5/6 — 19:07

2019年4月28日逃犯條例遊行

2019年4月28日逃犯條例遊行

有時諗諗吓,其實我都唔知咁緊張去反《逃犯條例》修訂,係為咗乜。

即係咁,今次修訂,最大鑊嘅除咗係記者,跟住就係商界。咁記者無得撈,最多轉行,你話香港咪接收唔到大陸新聞?咁都無辦法㗎,條路自己揀,仆街唔好喊,唔理咪唔理囉。

咁商家呢?商家就唔同,唔通轉行咩?就算依家無事,只要你有生意喺大陸,或有啲關係,你就好似成世畀人捏住個重要部位咁,瞓唔安食唔落,唔知邊日無端端上面權鬥換咗人,或香港換了一個同你有過節嘅方丈特首,你就好易畀人引渡去調查,就算冇罪唔落案,困你兩年,以你身嬌肉貴肚滿腸肥嘅生意佬身段,真係如墮地獄,夠你有排受。再加上,條例修訂後,外國有咩行動呢?人哋就響哂口㗎喇,但你林鄭一意孤行,仲有咩好講?撤資?取消獨立關稅區地位?最後連生意都冇得撈,都係呢班商家受。

廣告

既然係你受唔係我受,不如先同呢班商家佬計計數。好喇:

(一)當你哋冇事冇幹,係大陸大展拳腳享受二奶溫柔鄉嘅日子,我哋喺香港爭取民主自由人權保障,你笑人戇居;

廣告

(二)年輕人為未來爭取更好嘅政治社會環境,你鬧人廢青;

(三)人大 831 落閘違反承諾唔畀香港人普選促成佔領運動,你話人搞事阻頭阻勢;

(四)成個議會早已畀建制派玩晒,我哋個個去投民主派保住關鍵席位時,你哋商家佬例牌投建制派;

(五)平時做政治捐獻時,自然係冇乜民主派份,捐畀建制捐畀民建聯就豪氣干雲;

(六)政府要倒錢落海搞大白象基建,你例牌讚成兼幫手指鹿為馬助紂為虐甚至從中分一杯羮;

(七)當好多人想守住本土搞好香港,你叫人去大灣區話嗰度大把前途……

我諗淨係以上呢筆債,都已經夠哂畀我哋問一句:咁依家你哋發覺「今翅大鑊鳥」,又唔敢出聲,又唔幫手反抗,個個縮頭烏龜粒聲都唔敢出,咁我哋呢啲畀你哋當成「傻仔廢青搞屎棍」嘅人,做乜要幫你手反抗?

真係諗諗吓,不如大家攬炒,等你試吓咩叫真正嘅「沒有誰比誰高尚」— 大家一同活喺極權恐懼之中,都係一個唔錯嘅選擇喎。

 

(標題為編輯所擬)

作者 Facebook

發表意見