立場新聞 Stand News

選委會當選感言:平等博愛是香港核心價值

2016/12/14 — 12:10

選委會投票結果已經公佈,感謝各位社工朋友的支持,我有5999票,係兩位得票最高的候選人之一,而最開心嘅係民福團隊嘅22位兄弟姐妹都一齊當選,社總嘅所以候選人亦當選,另外一啲當選嘅朋友都係支持民主嘅。

我已經係第三次參加特首選委會選舉,想係呢度講一聲,多謝各位社工選民,因為其實我唔係一個註冊社工,我係來自社工服務嘅對象群體:失明人嘅群體,而呢個群體我無離開過。係我過去咁多年嘅工作裏面,我做過政府、國際團體樂施會、港大,以至現在社會企業嘅工作,而無論我係乜野身份,我都無離開過失明人嘅自助運動,因為呢個係我嘅根。

我相信人無論有咩差異都好,最重要嘅一種價值: 平等,我好希望係我嘅工作、同埋參與嘅唔同團體中,都能夠體現同推動平等呢個信念。而最開心嘅係得到好多朋友嘅支持。在每一個唔同嘅地方,無論係香港定海外;又無論係唔同嘅行業,政府、企業、民間團體都好,都有好多人有同樣嘅信念。

廣告

平等、博愛就係我地香港嘅核心價值,我仍然相信係一國兩制嘅框架下,我地係可以體現呢啲嘅價值,我地仍然要打破小圈子選舉,而功能組別錯誤嘅地方就係相信人因為有專業知識或者有財富、或者其他嘅原因而擁有權力,於是佢地就應該有多啲嘅地位去決定我地呢個社會點運作,但係我地相信人係要透過平等嘅制度,從而去反映社會嘅集體意願。

我地今日嘅社會貧富懸殊,好多基本民生問題、房屋、老人退休、傷殘人士嘅保障等等好多事情都要做,點解我地有足夠資源去解決一啲問題,而又無足夠嘅社會意志去解決上述嘅呢啲問題呢?我認為都係同選舉制度唔平等有關嘅,所以我地仍然需要努力達致呢啲目標,多謝各位支持。
 

廣告

(編按:本文作者是將選出下屆特首的選舉委員會社會褔利界當選者;標題為編輯所擬)

發表意見