立場新聞 Stand News

選委會 300 席有乜用?

2016/11/20 — 19:29

【文:賀穎傑@前線科技人員】

關於特首選委,大家可能覺得民主派極其量只可取得 300 多席,喺 1200 席嘅大圍入面,其實發揮唔到壓倒性作用,即係冇用… 如果真係咁諗就損失重大。此文不長,希望讀者可以閱畢。

300席護城牆

依家先重溫 2012 特首選嘅數據:

廣告

梁振英

689 (57.4%)

何俊仁

76 (6.37%)

唐英年

285 (23.8%)

白票

75 (6.29%)

廢票

7 (0.59%)

總投票數  

1132 (94.89%)

2012 年,民主派只有約 200 席,過千席係建制嘅,而當日 689 只得 689 票。

因為係暗票,所以無法確實知道邊 689 席投票俾佢,而由於投何俊仁嘅票加上白票都少過民主派嘅總票數,可假設有六百幾票係建制嘅,而有幾十票係當日矇查查,以為 689 係人嘅民主懵丙票。

廣告

嗱,如果民主派當日可以攞多百零席,咁所謂六百幾建制票就可能得返五百幾,即係如果冇民主懵丙票嘅話,其實 689 就唔夠 601 票過最低門欖喇,即係要重選。

當然,2016係乜樣,依家完全冇 idea,北京到底係派返隻狼出嚟,定係派豬狗狼配搭,暫時無人知,我哋只係知道一定唔會係人嚟嘅。

咁依家大家大愛少少,全投民主派名單嘅作用就係,如果真係 2012 重演,咁起碼我哋可以有一個否決權,就係可以搞到佢重選,都絕對唔會俾隻狼跑出。事實上,北京遲遲冇決定,佢哋亦都係睇餸食飯,睇吓民主派攞到幾多選委席先,然後先決定可以欺凌港人到乜嘢地步。

所以 300 席雖然唔能夠選到民主派特首,但起碼可以防狼,希望各選民可以納入考慮,踴躍投票兼一票不留建制,先建一個護城牆迎戰特首選舉。

疑神疑鬼、思覺失調?

至於邊個係鬼,希望大家可以暫時唔好考慮呢個問題住,因為第一步都唔肯行,衰咗就係自己嘅責任,無得賴,北京可以堂而皇之話民主派都冇足夠選民支持,與人無尤。至於第二步發覺投票數字不符 300 席應有結果嘅話,到時可以再聲討,但起碼敵人明確,而唔係疑神疑鬼,還未出師身先死。希望大家唔好忘記 2015 政改一役,最終所有「鬼」都係投人票嘅,就算今次係暗票,亦可事後作數據分析辨別真鬼嘅存在,而唔係疑神疑鬼,搞到北京都未做嘢,民主派已經自己嚇死咗自己。

贏咗都會釋法啦,不如訓覺?

至於北京會否再次輸打贏要、港人防狼成功之後釋法處理?如是,咁就即管放馬過嚟,怕你釋法呀。釋法 DQ 梁游,美國已經如前文所述,翻炒 Hong Kong Human Rights and Democracy Act 向北京示警,而且今次出面嘅係參議員 Marco Rubio,而唔係 2014 年出面嘅眾議員 Chris Smith,即係升咗級。如果再細看 Rubio 今次嘅法案簡介,條文之辣,達現時制裁俄國佔領克里米亞事件級數,除咗 2014 提及嘅重新考慮 US-HK Policy Act 之外,仲附加對打壓香港自由嘅「有關人士」進行在美資產凍結同埋會被拒入境。如果我係建制人士,依家 JR 緊民主派議員嘅話,我就情願低低哋話唔記得交保證金了事喇,咁辛苦攞張綠卡,然後奶共奶到自己入唔到境,玩下手連美國層樓同銀行戶口都俾人凍結埋,你咪同我開玩笑,都係同北京撈吓油水啫,洗唔洗咁搏呀。

所以如果大家咁叻仔,搞到北京要釋法處理,或者任何肉酸方法處理嘅話,咁 Rubio 條辣法就可以喺北京幫忙之下,喺美國國會通過喇。與其束手就擒,不如攬炒,你要滅港人口,港人亦唔會留返一個活嘅香港俾建制享用,大家話係咪?所以特首選委,重中之重,千祈唔好放棄。

發表意見