立場新聞 Stand News

選舉唔係個人競技 係球賽埋班 唔夠人就冇得打

2016/9/4 — 12:59

9月4日上午,將軍澳一選區門外。

9月4日上午,將軍澳一選區門外。

【文:Carol Lam】

香港立法會選舉,唔係選救世主,係球隊埋班。喺比例代表制同分組點票下,泛民(或者非建制派)籌夠人,場波先有得打;泛民唔夠人入局,即係攬炒,未打先輸。
點為之「夠人」?就係泛民要保住三分一即24席關鍵小數,以免假普選等惡法通過;保住直選過半數即18席,以免立法會徹底淪為政府嘅象皮圖章。

泛民支持者真心想立法會有效運作落去,就要識計數,識棄保。一旦泛民關鍵小數被衝破,話之你心儀、崇拜嘅個別議員,辯才幾咁好、出席率幾咁高、發言次數幾咁多、喺議會外抗爭幾咁勇、喺議會內掟嘢幾咁狼,都冇用,因為政府喺建制派庇蔭下,已經夠晒票,唔再需要畀面立法會,睬你立法會都嘥氣有味。我係講緊整個立法會,唔單只泛民。一旦立法會表決議案時,建制派個個議員都係應聲蟲,泛民又一啲威脅都冇,我係特區政府,我都唔會尊重呢個立法機關。

廣告

講到尾,立法會議員真正無法取代嘅職能,就係表決議案。表決議案唔係單挑,而係團結合作的對決。泛民議員嘅終極工作,就係合力保住足夠議席,保住議案否決權同政府談判權,唔好畀佢崩壞。泛民喺現屆立法會直選,已經只得18席,少一粒螺絲,就係咁先。

我明白立法會自1998年選舉以嚟,一直都好似無所作為,只能守,不能攻,有時甚至守都守唔住,好似高鐵咁,係令人好洩氣、好想作出改變,甚至係激烈改變。

廣告

睇選舉論壇,成日有建制派或獨立候選人,將議會空轉賴落拉布、掟嘢、「和理非非」、出席率低等等,其實呢啲嘢都唔關事,黃定光開會唔瞓覺、唔撩鼻屎,立法會都唔會好咗。只要立法會一日有分組點票,永遠都冇提案權,立法會嘅效率,可能就真係得咁多。即使重啟政改,按《基本法》咁先普選特首,再普選立法會,會否觸碰分組點票問題,仍是未知之數;提案權更加係《基本法》第62條賦予特區政府喺權力,唔關政改事,想改就要改《基本法》,呢個可能就係熱普城講「全民制憲,永續《基本法》」,都有人支持嘅原因。

「全民制憲,永續《基本法》」係咪真係可行,就要請選民睜開眼睛睇清楚《基本法》第159條,有幾多關卡。選民亦要諗清楚,一旦「全民制憲」失敗,熱普城下一步可以做啲乜,係咪「勇武抗爭」?「體育救港」?還是倒轉次序,用「勇武抗爭」去落實「全民制憲」?「勇武抗爭」嘅對象係邊個?係泛民、建制、整個立法會、香港特區政府,還是喺北京開會嘅全國人民代表大會?《基本法》第159條講明「本法的修改權屬於全 國人民代表大會」,有冇辦法去北京「勇武抗爭」?還是到頭來都只係等「終有一天感動你」?呢啲「勇武抗爭」或者「感動」工作,係咪一定要喺議會內進行?

香港人經過咁多年,係時候要諗清楚立法會嘅能力所及,本質係乜,然後透過選票,令立法會得以繼續擋住洪水猛獸,捍衞香港人嘅底線,不至於武功盡廢。我亦希望選民不要將民生、民主工作嘅重擔,交咗畀立法會就算數。改善民生,爭取民主,應該分工合作,人人有責,代議士喺議會內發聲,亦需要有民意喺議會外支持先得。

選民投票後,繼續認真看待、跟進每個政治議題,抽絲剝繭,搵出最可行嘅解決方法,並勇於表達民意,先係對抗消極、無助感的最佳方法。

至於今日,各位關心香港嘅巿民可以做嘅,就係不受負面情緒困擾,喺立法會選舉中投下神聖明智嘅一票。
 

發表意見