立場新聞 Stand News

避免「校園欺凌警察子女」行為指引

2019/9/4 — 15:53

立場新聞圖片

立場新聞圖片

自從有傳說謂警察的子女新學期回到學校之後,會受到校園欺凌對待,甚至說有老師會鼓勵學生欺凌警察子女,近兩個星期搞到人心惶惶,好似真嘅一樣,全城陷入恐慌狀態。員佐級協會主席一方面對警察棒他別人的子女推波助瀾,甚至落手落腳,仲會話示威者係曱甴。另一方面就一臉憂戚懇請各界不要欺凌他們的子女。父母愛子女之心表露無遺,好似得佢哋D仔女有阿媽生,真係令人動容!正所謂:

可憐警察父母心,施暴扑頭鑊鑊甘。
只怕報應在當前,子女回校被侵侵。

社會各界看着那位員佐級協會主席的虛偽面孔,可以說是人人血液沸騰,心跳加速,腎上腺素上升。

廣告

另一方面,除了警察呼籲不要出現想像中的欺凌他們的子女,特首也乘機繼續擺警察子女上枱,在她的記者會中煞有介事,高調關注這一項未曾發生、也根本不見得會發生的事件。政務司長及財政司長又已經發帖文譴責,可見問題十分嚴峻,已經去到你死我亡的關鍵時刻。正是:

特首高官好超前,煎蛋未上先落鹽。
製造恐慌當應驗,挑撥離間要打尖。

廣告

面對如此嚴峻的局面,一眾老師可說是隨時動輒得咎。如果有同學仔打架鬧交,其中一方涉及警員子女,點算?係唔係唔需要秉公辦理?呢個問題嘅答案一字咁淺,總之一定就係對方唔啱,一定係校園欺凌警察子女!聽我講,一定冇錯㗎啦。提升到呢個咁嘅政治層次,就只能講政治正確,唔能夠講是非黑白。這與當前的社會氣氛,可說十分對應。

警察打人就係專業,就係果斷;你問警察有冇良心,就係襲警,就注定要俾佢扑濕,有版大家睇。因此,以後在處理校園同學之間嘅糾紛,也只能以這個模式為標準,否則便是縱容校園欺凌警察子女,可以說是罪大惡極,隨時監都有得坐,仲要俾中共喉舌批評你哋係教壞學子的失德教師。呢頂咁嘅帽子,唔係普通人可以戴得起,大家千祈唔好博。

總之,以後知道邊個學生係警察嘅子女,就要當正佢係高衙內,當正佢老竇就係高俅。夠惡未?只要咁樣,各位老師就自然會識做,讓警察子女享有國內特殊階級官二代嘅特殊待遇,永遠只有佢哋贏,絕對唔可以俾佢哋輸。千祈唔好扣佢哋分,唔好批評佢哋操行唔好,要保證佢哋年年考第一,打印仔就只能俾白兔或者星星,絕對不可以俾豬仔。記住:

警員子女要優先,不分好醜皆狀元。
未曾考試先完卷,欠交功課當特權。

嗱,咪話唔預先警告大家,各位老師、各位在學校嘅?仔?妹或者廢青,千祈唔好話唔知邊個係警員嘅子女。自從「校園欺凌警察子女」這個傳說廣為傳播之後,特首、高官、警察組織已經先後提出警告。而且,為咗慎重其事,所有警察子女據說已經每人獲派發一個鎯鎯以資識別,所以無知唔係藉口。

既然貓貓已經掛咗鎯鎯,你哋D老鼠曱甴仲夠膽埋身?睇多眼都有罪!呢個鎯鎯唔單只係警報器,仲係身份嘅象徵!知冇?所以一見到呢個鎯鎯,大家就要肅靜迴避,嚴禁放屁。要對所有警務人員嘅子女肅然起敬,唔准多多聲氣;大家只能夠跟住佢哋尾,唔可以行喺佢前面;打交只能舉手投降;考試唔可以高分過佢哋;辯論比賽你哋一定要係敗方;各種體育運動及競技項目,你哋最多只能攞亞軍;各種校隊及學校代表嘅位置,一定要首先留俾警察子女;猜情尋無論佢出乜,都一定係警察子女贏。總之一句講晒,公就佢贏,字就係你哋輸,就係咁簡單。如果佢哋扭計話唔制,一定入晒你哋數。鬼叫你哋冇個好老竇陀槍揸警棍!正所謂:

學童好醜命生成,老竇當差最標青。(「青」字作上聲)
凡夫俗子應照鏡,鎯鎯都冇正廢青。(此「青」是去聲)

今時今日香港地,真係幾荒謬都有!已經發生咗嘅,例如警察在校園內外欺凌香港人的子女就冇人理,子虛烏有嘅警察子女在校園被欺凌就煲大嚟講。又有啲咁嘅所謂教育局長罔顧事實,特首高官竟然做咗員佐級警察嘅應聲蟲。據講警隊高層的子女,開學之後有便衣警察陪同護送上學,怪唔得警隊成日都話唔夠人,仲話要加人工添!香港警察唔係保護香港市民,佢哋而家主要嘅職責,係保護警察自己嘅子女,保護警察嘅利益!邊個多多聲氣,就扑濕邊個。打完你仲要告你暴動。唔係咩呀!

作者 Facebook

發表意見