立場新聞 Stand News

邊個做特首都死

2016/12/11 — 11:09

葉劉淑儀、梁振英、胡國興、曾俊華

葉劉淑儀、梁振英、胡國興、曾俊華

梁振英突然宣布唔參選,唔少人高聲喝采,有啲媒體仲話香港有救,總之講到CY係妖魔,冇咗CY就乜問題都可以迎刃而解。

平情而論,CY最大問題係冇人緣,但任內實在做咗一定功績,「限奶令」,叫停「雙非」,壓抑樓價,處理佔中等,確係有效果,當然你可以話做得唔夠或唔好,但Loser認為喺咁艱難嘅政治環境下,都算有交待。

喺今日咁政治化下,邊個做特首都死,就以港人最關心嘅樓價問題,人人都知治標之源係增加供應,然而𠲖家市區冇地,你要喺新界發展,啲人話破壞鄉郊,要保護農田;要喺郊野公園發展,環保人士又吋士不讓;要收棕地,新界班土皇帝又開天殺價;好喇,想話收返部份高爾夫球場,有錢人話冇地方打波;最衰仲有啲搞破壞嘅人,政府推地招標,佢哋走去司法覆核,你話邊度搵地起樓?

廣告

呢個問題邊個上場都係死結,宣告參選嘅胡國興接受電台訪問時,對於樓嘅問題,佢話會搵多啲地起樓,主持問佢去邊度搵,佢話新界大把棕地,再問佢:「呢啲地點收?」佢就話俾錢。

聽完胡官隨口噏嘅答案,就知搵佢做特首死硬,邊個唔知用錢收,若然咁簡單,政府早就解決咗,問題係用幾多錢嘛,要計成本,班新界佬就係吓吓要求多多,貪得無厭,所以橫洲先搞唔掂。胡官將問題簡單化,若佢做特首,庫房儲備好易耗盡。Loser可以咁講,呢個樓市覓地問題,任何人做特首都難以解決。

廣告

好喇,講返另一問題,即係政改,新特首上任後,呢樣嘢點都要再做,但任憑你邊個做,都難以滿足到啲年青或激進一代人諗法,因喺佢哋心中,一定要馬上普選,根本半分不會退讓,但喺現實情況,中央又點會俾你亂嚟,咁你話新特首可以點做?

樓市,政改兩座大山,CY要面對,新繼任人都走唔甩,CY移唔走,其它人都唔容易移走,不妨又睇吓邊個做到愚公去移走佢。

 

發表意見