立場新聞 Stand News

【鄭若驊門】林鄭政府其實真係咁弱智,唔係講笑

2018/1/9 — 18:12

鄭若驊門(又真係有道門),先唔理鄭若驊事先係咪真係唔知,定係扮唔知,但幾乎可以肯定咁講句,林鄭月娥確實係白痴。

唐梁之爭之後,「僭建」已經係香港政圈最 common 嘅政治地雷,連民主派人士參選,都會check下自己屋企有無僭建,局長、司長、行會成員人人都俾人查過,鄭若驊新官上台,「友好」傳媒循例都會睇睇佢屋企。

而林鄭3月已經搵鄭若驊做律政司,就算後來袁國強留任,全世界都知袁國強做埋一地兩檢就會走人,換言之林鄭最少有近半年時間幫鄭若驊「淨身」。

廣告

最離奇係屋宇署其實12月27號,即係鄭若驊上任前成十日,已經收到傳媒查詢,結果成個政府竟然集體食慒咗,要到報道見街先知道要拆彈。

成件事實在太離奇,離奇到難以置信,於是又浮出一堆陰謀,例如有人有心「跣」鄭若驊一鑊,知情不報,政府想用鄭若驊單嘢蓋過其他新聞,甚或至鄭若驊本身好唔想做,使出一招「黑暗兵法」自我引爆,但堆陰謀其實講唔通。

廣告

一來鄭若驊唔想做可以 say no,二來除非林鄭月娥傻咗,否則無理由留個炸彈炸自己,亦無見到政府有怎機推其他爭議議題出嚟。提醒番林鄭出名係「不沾鍋」,選特首個陣主動自爆林兆波係英國被傳有婚外情,拎嚟講笑,如果佢早就知鄭若驊道門,無可能唔率先消毒。而且律政司事關重大,一定要中央點頭,「跣」鄭若驊等如「跣」中央一鑊,你敢唔敢?

講完一大輪,排除晒所有不可能,淨低唯一合理解釋,就係「鄭若驊門」之所以發生,確實係因為一系列弱智,袁國強趕住走,鄭若驊無上報,林鄭醒唔起,屋宇署又無出聲。

成件事其實同林鄭月娥俾 500 蚊乞兒、搭的士買廁紙、唔識用八達通好類似,就係根本唔可以用常理去理解「為官30年」嘅林鄭月娥。佢好似好「能幹」、「強勢」,但其實極度缺乏常識,甚至弱智。

更大鑊應該係佢唔聽人講,剛愎自用,成個政府團隊咁多人,成日開集思會,挖咗一大堆「傳媒人」入政府,但結果無任何一個人,有機會或者敢提佢一句,「喂,鄭若驊屋企有無僭建架?」

Anything that can go wrong will go wrong,林鄭政府其實真係有咁弱智,唔係講笑。

 

(標題為編輯所擬;原刊於作者 facebook

發表意見