立場新聞 Stand News

鍾樹根:用水炮是國際標準 濕身又唔係失身

2015/4/10 — 12:31

對於警務處於財政預算案中提出購置3輛「人群管理的特別用途車」(水炮車)一事,民建聯立法會議員鍾樹根今早表示,買水炮車是「國際標準」,「水炮最好啦,濕下身之嘛,唔怕失身啦」、「唔會傷到人」,因此贊成用水炮車管制人群。

在今早的保安事務委員會會議上,多名泛民議員關注到警務處要求購買3輛水炮車一事。鍾樹根在發言時表示:

「買水炮車符合國際標準,因為國際、個個國家都用水炮嘅,我哋香港冇水炮呢,用催淚彈又話唔得,搵棍扑又話傷身,水炮最好啦,濕下身之嘛,唔怕失身啦。唔夠呀?三架唔夠,我都同意。用水炮就最好架喇,所以我都贊成要買,因為呢,唔傷人吖嘛!又可以有效咁控制局面,而且而家啲暴力越嚟越犀利,下嘛,盾牌又裝鐵釘又盛,用水炮可以拉開個距離,唔使警民衝突得咁大。咁我哋係贊成用水炮車嘅,多謝。」

廣告

由於政府購買任何超過1千萬元的物品,才必須到立法會有關事務委員會,公民黨陳家洛在會上質疑,警務處計劃用每輛900萬元購買3輛水炮車一事,是「特登減到900萬(元)一架」,繞過事務委員會,直接去財政預算案拿錢。

會計界梁繼昌亦指出,英國最近亦買了水炮車,但內政大臣都宣布暫時不會使用,因為未能評估對人體造成的傷害,「水炮可以用嚟開礦,水都可以用嚟切金屬,對於水壓等等問題,(政府)完全冇講過,我哋不能夠完全咁易放過」。

廣告

稱記者戴黃絲採訪挑釁市民

另外,鍾樹根今早出席dbc數碼電台節目時,批評港台記者戴了黃絲帶去採訪,在現場挑釁集會的市民,又指港台的報道不公道,只報「黃絲」,卻不報反黃絲活動。出席同一節目的港台製作人員工會主席蔡玉玲即時澄清說,戴了黃絲帶去採訪的片段,早前已證實是偽造,亦表明該台在佔領運動期間有報道不同意見的消息,希望鍾收回不實指控,「如果你單方面咁指控我,喺呢度我要為嗰位無辜嘅同事澄清,我亦都希望你收返頭先嗰個講法」。

不過,鍾樹根不接受蔡玉玲的解釋,指自己的言論不是由看片段而來,而是自己的太太當晚在現場目睹情況,「我唔會收返,因為當時我太太都在場,你們講啲說話、訪問人時,講啲說話去挑釁人哋!你自己個身份都唔知做乜,你做記者!」

發表意見