立場新聞 Stand News

鍾樹根:CY「大志難成」 「不能避雨亭」民政署責任最大

2015/7/7 — 16:32

一向語出驚人的民建聯立法會議員鍾樹根,今早出席電台節目時繼續金句連連,除指特首梁振英「大志難成」,他寧支持務司長林鄭月娥或民建聯立法會議員譚耀宗當特首外;對於早前鰂魚涌海堤街被市民譏為「不能避雨亭」的社區設施,身兼東區區議員兼前區議會主席的鍾,就批評民政署有不可推卸責任,「唔得專業呀,你無理由整啲咁嘅嘢」。

鰂魚涌5月出現的「不能避雨亭」,因亭下的巨墩佔用了七成避雨空間,導致避雨亭得物無所用,被網民瘋狂恥笑,結果於上月被拆走。建議興建該避雨亭的民建聯區議員丁江浩,及後表示自己與事件無關。那與誰有關?鍾樹根今早出席商台節目《在晴朗的一天出發》時就稱,民政署有不可推卸的責任,因為署方交來的設計圖看不到相關石墩。

被問到為何責任不在民建聯而在民政署,鍾樹根指要「公平啲」,認為民政署既然做不到,就不應只「應酬」區議員而硬要做:

廣告

「俗啲講,泥水佬整門口,過得自己過得人...... 問題係,你(民政署)自己認為唔得嘅嘢,點解要畀人呢?你係工程師嚟架,你幾錢一個月啊?.....唔得專業,無理由整啲咁嘅嘢。」

「大佬我哋真係唔係工程人員吖嘛,你畀嘢我你要試過得先得架嘛。係,你可以話(議員)把關不夠細緻,咁我哋咪要學習囉。」

稱議員不用道歉 民政署要道歉

廣告

對於有人擔心區議會所有工程都這樣,鍾樹根稱,「唔會嘅,1億嗰啲就唔會。哈哈。」被問到議員是否需要道歉,他直指不需要,反指民政署要道歉。

民主黨東區區議員趙家賢接受該節目電話訪問時表示,丁江浩曾與民政署工程人員視察駁,過現場,及後同意採取相關設計,鍾樹根在節目中反「喂大哥呀,阿趙議員,佢去睇個西(估計為site的誤讀)咋,唔係有實物架嘛!你唔好推得就推啦。講到你冇責任。」

他建議民政署設計時不要只做示意圖,亦要列清楚尺寸,做好模型,即使是紙模型,或電腦模型。但在主持人的追問下,鍾樹根承認區議員有責任,「可以追問,下次叻啲囉。(主持:係咪Dreaming on office呀?)唔係,我哋好少」。

梁振英「大志難成」

另外,談到梁振英昨出席民建聯周年會慶酒會時,形容民建聯是政府重要工作伙伴,相信該黨繼續是愛國愛港重要力量。民建聯立法會議員鍾樹根今早在商台節目笑言「無聘請佢(梁振英)做我哋代言人喎」。

對於未來會否仍如競選般支持梁振英,鍾樹根稱要看他將來的政績:

「佢呢就好有心,但做唔到囉有啲嘢,有好多外在原因嘅,亦都唔係佢個人問題... (主持:佢個人有無問題?)佢個人都有問題,問題就係政治嘅嘢太多,變咗佢想推得好急,人哋咪捉住佢啲嘢嚟砌佢囉...... 

佢真係點講呢,『大志難成』啦,佢好多嘢想做但做唔到」。

被問到若財政司長曾俊華和梁振英參選特首,他會投票選誰,鍾樹根指「咁無辦法,逼我投梁振英。」他解釋,曾俊華做法跟前朝做,沒甚麼新意,「蕭規曹隨」;但如果財政司長梁錦松與梁振英選,他指梁錦松則「好似大意得滯」。

不過,如果加入政務司長林鄭月娥參選,鍾樹根直言:「林鄭月娥真係有得諗喎。呢個要秤下啦喎。(主持:如果(民建聯議員)譚耀宗與梁振英呢?)嘩咁梗係譚耀宗啦。」

發表意見