立場新聞 Stand News

長毛確實係講得好

2016/10/27 — 8:28

梁國雄

梁國雄

出席(商業電台)同一節目的社民連梁國雄就指,「鬧佢哋(青政)嘅聲已經太大,大到一個程度好似文革咁」,認為中共不是想取消他們的資格,而是要他們公開踐踏自己的人格,認錯方能宣誓,要把對方鬥至人格全無。被問到青政的行為是否如郭榮鏗所講,要全港人埋單,梁國雄回應稱「民主政治就係你選咗人入去,選民自己諗啦。制度而言無辦法向後退,張單一定要埋,因為受選民所託,要維護核心價值,不能讓當權者憑制度對任何人施以暴虐」。梁國雄指現時立會主席梁君彥都被自己人鬥,可見建制派之劣根性,聲言「做主人隻狗真係好慘」。

852郵報報道節錄)

青政兩條新丁確實係唔抵爭,就算呢次最終真係冇咗兩個位,其實都可能爭取唔到好多人嘅同情。有時確實需要明白,無論以為自己嘅出發點有幾正義,以為自己的立足點有幾正確,仍然需要正視自己嘅局限,入到議會,就要睇到同路人團結合作嘅必要性。況且,歷史不斷教訓大家,以為自己最正確最正義嘅人,往往就係犯上重大錯誤,干犯最嚴重歷史罪行嘅人。共產黨就係一個最好嘅例子。

選舉嘅時候要搶票,已經一再對泛民出言不遜。選到之後,自己得兩個人,又冇議會經驗,係咪應該謙虛D,向D有經驗嘅取下經?對住建制派人多勢眾,加上中聯辦喺背後出謀獻計,又有政府喺後邊撐腰搬龍門,一個唔覺意,就會中招,跌入佢哋嘅圈套。宣誓之前香港政府同中聯辦嘅發話,其實就係等佢哋入局,似乎係想挑動佢哋透露更多港獨傾向嘅言論,作為日後打官司嘅理據。兩條新丁自己盲樁樁,又唔同人商量,終於打錯張靚牌,比建制派同政府及北京挾住上。兩個禮拜以來明顯睇得出,兩個人冇乜還擊之力。郭榮鏗嘅講法,其實亦都係一啲都無錯。不過,依家涉及要捍衛香港嘅制度,泛民主派亦都必須坐上呢條船。

廣告

再奉勸一句嗰啲盲目支持嘅「道旁兒」,唔好一唔啱聽就講粗口,幫唔到忙,仲可能有份推佢哋去死。依家大部份泛民政黨同議員,包括郭榮鏗都出嚟捍衛佢哋嘅席位,要主席幫佢哋宣誓,今日才不致入唔到會議室,不致比人抬走。睇嚟佢哋兩個都知道邊啲係真正嘅敵人,邊啲其實係可以合作嘅盟友。所以兩個都分別發話,向其他「一眾泛民議員道謝」,說明仍然學到嘢。諗真,今日呢句道謝,係自九月選舉之後佢哋向泛民議員講得最好聽嘅一句說話嚟。

我一向都話,長毛除咗係議會上面嘅發言有質素之外,佢係抗爭行動的取捨及姿態上,一向都拿揑得十分好,孰輕孰重也掌握得十分到位。我覺得佢比所有其他泛民議員都更明白民主嘅真諦,佢回應郭榮鏗嗰段話充分反映佢嘅政治智慧同埋大度。今晚佢就連冇乜泛民議員願意出席嘅集會都去埋,算係仁至義盡啦。成個集會得百多人,都唔知嗰啲之前撐到盡嘅「道旁兒」去晒邊!究竟邊啲人去救火?邊啲人做咗十個救火的少年?

廣告

講開又講,長毛清楚向全世界證明,有sense,有point,有料嘅人唔一定要高學歷。只有嗰啲愚蠢到不斷講笨話、做賤事、向全世界說明自己有多愚昩的建制派人物,先至有需要買假學位,要拿假學歷來充大頭鬼、冒充博士,冒充著名大學畢業。對於呢類人,嗰張假證書就好似亞當夏娃身上嗰片樹葉,要用嚟遮住自己嘅空疏、淺漏、無知。呢類人除咗做建制派之外,應該冇乜其他選擇。

有需要買這片樹葉的,請留意民建聯幾位議員會見市民的時間。

發表意見