立場新聞 Stand News

長毛薯片其實冇分別 都係帶你遊花園

2017/2/9 — 19:39

【文:Humpty Kumpty】

長毛宣布參選特首,爭取三萬七千個「公民提名」。佢冇提具體政綱,但政制方面堅持「反對八三一」及「公民提名特首候選人」。得罪講句,呢個堅定不移嘅原則,其實同薯片「重啟修改特首產生辦法程序,爭取早日實現雙普選」嘅訴求只係百步與五十步之別,兩者都係等運到,繼續虛耗市民光陰。

經過廿年「實踐」,明眼人都應該睇穿一個事實,就係每屆特首向中央提出政改報告、啟動五步曲,就好似古代廟祝祭天求雨嘅儀式一樣,你有你求,個「天」會否落雨畀你,則係另一回事。廟祝嘅禱詞可以只求小雨(重啟五部曲),亦可以求滂沱大雨(修改八三一、落實公民提名),但有分別嗎?佢始終只係一個「儀式」,同個天會否落雨冇直接因果關係。就算將來當選嘅特首肯喺政改報告中「如實反映」市民意見,要求修改八三一及提出公民提名訴求,咁又點?北京一樣可以拒絕,或者將八三一小修小補,依然畀個假普選你,如是又走完一趟五部曲,蹉跎幾年,大家又要巴望下屆有個「好人」當選特首,重新向北京「求雨」。

廣告

經歷雨革後,筆者已經對中共及真普選死心;中共政權本質不變,再啟動幾多次五部曲都唔會有助推動真普選;無論各參選人係咪主張重啟五部曲,或係咪提出推翻八三一等等,都只係鳩做,所以我唔覺得長毛嘅訴求會比薯片進步。「爭取普選」其實只係遊花園,帶你遊園嘅不論係特區政府,抑或泛民,你始終都走唔出個花園,幾年遊一次,遊到死為止。

「八三一」無法撼動  應另尋民主之路

廣告

筆者最關心嘅,係喺無法撼動八三一、不能落實真普選嘅情況下,各特首參選人有冇其他對策,可以在特區現有嘅權力範圍內,盡量實現民主政治。先旨聲明,我唔係「胡粉」,但目前睇嚟,只有胡國興能提出咁樣嘅政綱。胡官提出將全港選民納入為選委會選民,咁即使將來八三一框架冇修改到,選委會(或將來嘅提名委員會)都有高度代表性,同公民提名分別不大;就算最終不能實現普選,由全港選民投票產生嘅選委會嚟推選特首,亦近乎美國總統選舉人團制度,民主成分同普選差距唔大。

最重要嘅,係上述改革只需修改香港選舉法例,唔需要觸及基本法附件一,換句話講就係唔使啟動五步曲、唔使修改八三一、唔使事先問准中央,而且不需全體立法會議員三分之二通過,只需出席會議嘅半數議員支持便可,簡單得多。同理,將全港選民平均納入為立法會各功能組別選民,亦係只需本地立法,就可大大增加立法會民主成分,唔使等到實現咗特首普選之後,立法會先可以普選。

上述呢兩點,係特首有權做到嘅事,如果任何參選人只打算向北京「求雨」,將所有嘢交由中共發落,而唔係積極喺現有制度上尋求推進民主嘅方法,市民都唔應該支持。

將「八三一」放埋一邊  同薯片討價還價

長毛要參選,筆者唔反對,但泛民三百幾張選委票真係唔好白白浪費咗。有人認為薯片係lesser evil,為顧全大局非投他不可;亦有人認為林鄭只係草人,中央用佢嚇泛民落沓投畀薯片,所以寧投白票也不投薯片。呢兩種做法都係將選票射入鹹水海。

假如薯片並非真命天子,而林鄭又未必取得逾六百票的話,泛民300+將會係非常關鍵嘅少數。當然,你會話薯片係咪真命天子冇人知,但如果薯片冇中央支持,佢理應會好著緊泛民嘅選票,泛民若不趁機討價還討,要求佢修改政綱作為支持條件,便愧對港人。

我最驚嘅情況係:薯片一旦答應「修改八三一」等訴求,泛民就欣然接受,到時香港人又畀薯片帶住遊一次「五部曲」花園,無功而還。泛民其實應以胡官嘅政綱作為底線,要求薯片承諾修改選舉法例,擴大選委會及功能組別選民基礎,在特首權力範圍下「盡做」改革;如果佢有權力做而不做,毫無進取心,則咁嘅人選即使點樣「好人」,最終亦不過係中共傀儡或hea做,泛民就唔應該提名或投票畀佢。至於長毛等人最在意嘅「推翻八三一」及公民提名,除了有「重申原則」作用外,根本無助民主寸進,可有可無;如果北京唔畀真普選,你個「求雨」禱詞寫到天花亂墮,又有何用?

 

 

發表意見