立場新聞 Stand News

開槍的二三事

2019/10/3 — 19:30

荃灣一槍,轟起了香港人已經沸騰的情緒。

未經過調查,我不敢輕言誰是誰非。觸目所見,事情並非坊間言論一面倒。但正因為此,警務處長的言論更令人憤怒,竟然可以在未經過深入調查前就武斷開槍的合法及合理性。

日前,謝警司又有金句,話沒有受槍械訓練的人士,基於甚麼理據和知識,判斷警方做錯。

廣告

筆者不敢自認槍械專家,只受過最簡單嘅訓練,但當日訓練提及過對槍械使用的原則卻依然言猶在耳。説得上原則,自然是經過千錘萬練,經得起法庭考驗,符合法理情的。由此,我想對坊間一些謬誤糾正一下。

首先,槍唔係一個警示嘅工具,係一樣可以殺人嘅武器,所以係維持治安嘅 last line of defense。記得教官教槍械時,有三個要點,一定要記牢:

廣告

(1) 常滿 — 永遠要認為你的槍内裝有子彈,所以永遠不能拿來開玩笑亂開;

(2) 常瞄 — 槍管只應該瞄住會射擊嘅人,而哩個人就係導致你要拔槍應付嘅 threat。如果當時當刻面前嘅情況並無一個清晰嘅 threat 需要警員用槍應付,就應該槍嘴向下,以免走火等意外;

(3) 常中 — 基於上述「長瞄」要點,在決定開槍一刹,你支槍應該已經瞄準個 threat,亦因為對方有進一步行動所以你需要開槍 — 對方哩個行動就係你開槍嘅理據。先唔好講理據是否充分,但既然要開槍,就一定要盡量射中你瞄嘅人,因為射唔中就有誤傷無辜嘅可能性。

有好多使用槍械嘅規條,都係源於上述幾個原則及要點,我唔及警察熟,唔提。但哩幾點加埋,我卻可以澄清坊間幾個謬誤:

A:向天開槍

向天開槍完全違反所有使用槍械嘅原則同要點。如果警隊認為需要一大音量嘅工具示警的話,大可以引入其他無殺傷力嘅震懾性裝備。實情係,向天開槍,你無法預計子彈彈道,可以誤中樓上民居(在外國試過),也可以在子彈力盡下墜時擊中遠處無辜者嘅頭(在外國亦試過),造成人命傷亡。所以向天開槍係一個非常唔負責任嘅做法,警隊由佔運時做過,竟然無糾正,更將哩個動作合理化,如果因此造成人命傷亡,警務處長絕對係凶手。

B:點解唔射手射脚

基於上述「常中」要點,任何未擊中目標人物嘅子彈都有誤傷其他人嘅可能,所以一係唔開槍,但如果警員決定要開槍的話,自然應該瞄住對方最大嘅外露位置射擊,務求增加擊中嘅可能性。如果對方無遮無擋,哩個外露位置自然係其身體。開槍一剎,第一個目的係要阻止目標人物進行進一步嘅襲擊,以及會否傷及其他人;至於命中之後是否可能引致目標死亡,反而已經係其次(唔係話唔應該考慮,而係哩點應該放在決定開槍之前考慮)。

此文分析嘅並非荃灣一槍是否合理,而係希望透過細佬我少少嘅經驗分享,幫助大家更理性去了解一啲關於槍械嘅問題。至於哩槍應該開唔應該開,點樣唔應該或者違反咗咩守則等,我只能話有待調查(如果有的話)。

但我肯定唔會咁武斷話咩合法合情合理,囉。

如果講得有咩唔啱唔 update,歡迎賜教。

 

作者 Facebook

發表意見