立場新聞 Stand News

關心學生同時,唔好忽略蒙面頭盔入面另一些靈魂

2019/6/15 — 19:32

Peter Wong 攝

Peter Wong 攝

【文:Andrew Chan(阿行)】

我好怕抗爭者壟斷所有對年青人嘅關心。最近講,原來槍警只係弱冠之年。查返個個都細過我,嗰啲又唔係年青人咩?你哋成日話年青人衰衝動、被煽動:槍槍瞄正頭,唔係衰衝動咩?濫暴當光榮,唔係被煽動咩?

你哋覺得煙霧之中,口罩之上,一雙雙滿帶淚光嘅眼睛,係無知、稚嫩、遭蒙蔽。但你哋睇唔到喺蒙面頭盔入面,嗰啲幼小嘅心靈,已經朽壞腐化,淪為政權爪牙,而不自知。

廣告

我不斷諗,血腥槍手得廿歲,入警校時僅十八,當差得兩年,點解會變成咁?佢舊同學話,佢中學時蝦蝦霸霸 — 屋企遭遇乜嘢令佢咁?點樣令佢仇視同齡?點樣令佢只想服從指令,唔識思考,唔想反抗?

希望關心年青人嘅社會領袖,或者做青年工作嘅人,都唔好忽略呢班警察。佢哋有武裝,佢哋有特權,但除低頭盔,只係班初生之犢。你哋成日話,年青人係社會嘅未來,所以唔好衝動 — 就請注目呢萬幾個揮住棍、揸住槍嘅後生仔!我擔心,因為有啲平日會行走街頭,話係維持治安;有啲會走入警校,教出再新一代;有啲更加官晉爵,領導呢隊軍人。我哋納稅,將槍炮交咗畀佢哋,教識佢哋點用,換嚟點樣嘅社會呢。

廣告

請關心下佢哋,為佢哋禱告啦。唔好留於表面,話佢哋攰、辛苦。係嘅,見佢哋猛咁拳打腳踢,我都擔心會打到手軟。但請為佢哋殺紅嘅雙眼,為佢哋剛硬嘅心腸,更請為佢哋午夜夢迴,尚且悸動嘅良心而禱告。

我好多謝你哋,擔心一個個手無寸鐵嘅學生,係衷心嘅,擔心佢哋嘅身體,以至前途。但請將呢班後生警察排得更前,因為年青人嘅身體同前途,永遠都唔夠佢靈魂嘅墮落,咁令人扼腕、嘆息。

記念入咗警校嘅弟兄。

 

(標題為編輯所擬)

作者 Facebook

發表意見