立場新聞 Stand News

關於堅持投白票嘅人

2017/3/23 — 17:25

胡國興、林鄭月娥、曾俊華

胡國興、林鄭月娥、曾俊華

【文:陳澤滔 IT界選委】

林鄭贏嘅條件係要有601 票,無其他,只要唔係俾票林鄭,無人係幫緊林鄭。

仲有一種轉軚論,就係話保皇黨選委會因為曾俊華贏面增加而投佢。就當我唔拗,當呢個講法係啱嘅,民主300+ 講 98% 人投曾俊華嘅時候,個message 已經好完整send 咗出嚟。個別選委嘅決定其實已經影響唔到輿論。

廣告

之後係第一輪就要贏論。我睇唔到林鄭第二輪會多票過第一輪嘅可能。第一輪foul 走咗胡官,大家覺得胡官入面有無一票係會投林鄭?如果遊離建制係真嘅話,佢哋見到第一輪林鄭都唔夠600 票,佢哋會走頭踩多腳,定係痴埋去呢?你話「中共見唔夠票就會洗橫手」。我想問,中共要洗橫手需要等第二輪咩?你唔想有第二輪,我可以話俾你知,中共更加唔想有。因為有第二輪代表咗佢無能力控制個選舉。

曾俊華要贏,唔一定要第一輪;但林鄭要贏,一定係第一輪分勝負。

廣告

呢三個point 係講緊,反林鄭立場上,白票同投曾俊華係無分別。

呢幾個月我哋不斷不斷講lesser evil。我承認係有lesser evil,曾俊華係evil,但佢比林鄭好好多。我哋更加需要承認嘅係,投曾,係投evil,係同魔鬼做交易。有時為咗前進,呢啲交易係必需做嘅,但我哋唔應該去指責一啲唔做交易嘅人。

我哋更加應該多謝我哋嘅城市入面仲有一啲堅守原則嘅人。因為有佢哋喺度,我哋先可以偷偷享受同魔鬼交易嘅好處之餘,喺下一次同魔鬼戰鬥嘅時候,企喺呢班人後面,輕鬆用佢哋嘅道德高地同魔鬼對抗。

我哋好鍾意share 金句,但我哋從來都無諗過點解。「和諧唔係一百個人講同一說話,和諧係一百個人有一百句唔同說話之餘,又互相尊重。」(天與地)呢個世界100% 贊成率嘅地方唔係好多,出現嘅個個都係極權國家。喺民主社會用民主方法要求 100%,本身已經係一件十分違反邏輯嘅事。如果我哋係真心追求民主嘅,首先唔好令自己變成專制嘅人,唔好為減少撕裂而帶頭撕裂社會。

幾個月前,我哋曾經問另一班人:「點解你哋攻擊同路人咁樂始不疲?」、「點解你哋唔鬧下保皇黨?」

到今日,或者我哋要問嘅係,呢兩個月,你鬧得最多嘅,係啲咩人?係同路人定係敵人呢?要叫佢哋投曾俊華嘅,點解唔問下保皇黨呢?佢哋政治光譜仲近𠻹。

幾個月前,我哋見識到一種路線嘅失敗,點解幾個月後,我哋會不知不覺學咗佢哋呢?

甚至呢番話,我都想同幾個自命堅持嘅團體講,我知你哋好燥,我都係,但鬧佢哋笑佢哋港豬,其實唔會令佢哋叮一聲「哎呀我哋原來要堅守立場」,反而係撕裂咗本來唔應該撕裂嘅一群。

要講嘅係咁多,呢段說話唔係為我自己而打。因為我根本無資格。

發表意見