立場新聞 Stand News

阿 Sir 買炮ㅤ唔洗你教

2019/10/11 — 22:33

本土研究社製圖

本土研究社製圖

武器開支有幾多?

近來示威者買 gear 越來越困難,但警察嘅 gear 就不斷升級,TG 放題、水炮車、裝甲車逐步亮相,令人擔心警察手上面仲有無更多大殺傷力武器。過去幾個月公眾質疑警察花咗幾多錢買武器,同埋仲有幾多存庫,但呢啲資料,當然同警察嘅透明度一樣啦,完全當納稅嘅市民係透明,唔肯透露進一步嘅資料。

但好彩我哋可以從香港警務處嘅財政預算案中睇到少少趨勢。2014-15 年度,警察嘅「重型武器及裝備」嘅總開支只有約 $1.49 億,但直至 2019-20 年度已大幅上升 1.4 倍至 $3.61 億(預算)【註 1】。咁實際上買咗乜?仲有無新購入更多水炮車?Sorry,公開資料極少,正所謂「阿 Sir 買炮,唔駛你教」。

廣告

做盤靚數ㅤ疑隱瞞重型武器開支

2015 年初,傳媒發現警務處喺財政預算案加入購買 3 部水炮車嘅預算,每部 $900 萬、合共 $2,700 萬,引起公眾恐慌。當時雨傘運動落幕不久,政府唔會估唔到買水炮車會引起激烈輿論。但根據財政預算案規定,若部門採購每項超過 $200 萬嘅「機器、車輛及設備」,就須要喺預算案中獨立成項審議,所以無辦法唔公佈。

廣告

未知是否同水炮車爭議有關,政府喺 2016-17 年嘅財政預算案中,鬼祟咁將須「獨立成項審議」嘅限額由 $200 萬以上,大幅提高至 $1,000 萬以上【註 2】。呢個改動,政府完全無解釋背後原因,亦不合乎常理(通常更改限額都是因為物價通脹等,增加 5 倍並不尋常),而且剛剛係每部價值 $900 萬嘅水炮車之上。

換句話說,2016 年後,若警察買更多水炮車、裝甲車、聲波炮或其他意想不到嘅「大殺傷力武器」,只要「較到個 spec」令採購金額喺 $1,000 萬以下,咁就可以放入「小型機器、車輛及設備(整筆撥款)」或「警隊特別用途車輛(整體撥款)」帳戶中。話明係「整筆撥款」,即係歸類為「雜項」,無需要交代詳情。

自 2016-17 年「造盤靚數」起,同重型裝備及武器相關嘅「整筆撥款」嘅數字(即「小型機器、車輛及設備(整體撥款)」、「警隊特別用途車輛(整體撥款)」),已經大幅由 $1.81 億,膨脹至 2019-20 年預算嘅 $3.17 億。2016 年嘅「造數」,令政府毋須交代今年 $3.17 億「雜項開支」現金流嘅細項;相反,須獨立成項嘅「機器、車輛及設備」現金流只有 $4,300 萬。雜項總數係主要項目嘅 7 倍幾,你話唔係造數隱瞞都無人信。警察究竟買咗乜武器?不敢想像。

又唔做嘢,又唔讀書?

就「整筆撥款」嘅造數遊戲,曾經有議員提出質疑。張超雄議員在 2018 年曾經詢問警察「整筆撥款」嘅明細,只獲敷衍回應「撥款用於購置及更換行動裝備及支援前線的設施和執法、搜證及訓練裝備及設施」【註 3】,無具體交待,任何武器也可以屬於「行動裝備」,簡單啲講就係答咗等於冇答,又唔做嘢,又唔讀書。

警察唔答武器開支,絕對唔係個別事件。近年政府在公帑運用上逃避立法會監察,已成一個趨勢,尤其以警隊為甚。本土研究社翻查咗今年合共 500 條【註 4】立法會議員審議財政預算案時提出,與各紀律部隊(包括警隊、消防、懲教、入境等)開支有關嘅問題,初步發現警隊係「最多秘密」嘅紀律部隊。

每逢警隊被問及有關採購武器、新設備、資料情報系統嘅詳情,警察均會以多種理由拒絕提供,最常用嘅理由為「涉及警隊行動部署細節」或「沒有具體數字」;例如張超雄議員問及「胡椒噴劑、催淚胡椒煙霧器、伸縮警棍、左輪手槍、寸半口徑大口槍、雷明登散彈槍」嘅預算開支、存量、實際開支(問題編號 SB248 及 SB249);莫乃光議員問及警隊新購入的「資訊及情報系統」嘅種類和開支、是否來自中國供應商(問題編號 SB147);鍾國斌議員問及嘅「反恐裝備」、「反恐培訓內容及開支」(問題編號 SB012),建制泛民,一視同仁,均無可奉告。

議員詢問公帑運用嘅問題,只係牽涉一般性資料,如警察採購咗咩武器、咩裝備,既無關行動部署細節,亦唔係「國家機密」。事實上每個紀律部隊均有行動部署細節,同屬紀律部隊嘅海關,卻會按議員要求,公佈採購儀器的詳情,如掃描機、車底檢查系統、毒品辨識器等(問題編號 SB478),香港警察係咪有特權?係咪大_哂?

反修例運動進入第五個月,警暴已成日常,警察使用的武器規格越來越高,差不多每天都有市民被警務行動傷害,整個社會已陷入恐慌。若然政府還有挽回市民信心嘅意圖,除了成立獨立調查委員會外,更應該公佈過去五年、雨傘運動後所購入的武器明細,充分交代其採購理據及公開武器的使用守則。

 

【註 1】重型武器及裝備指「機器、車輛及設備」、「警隊特別用途車輛」等。2014-15 年至 2019-20 年財政預算案:總目 122 香港警務處,詳細資料
【註 2】概括而言,政府的採購預算以「大金額項目獨立成項、小金額項目放入雜項」為原則,雜項自然不會獨立成項顯示,以「整筆撥款」一次過向立會交代。2016 年,政府更改「大金額項目」和「小金額項目」的定義,界限由 $200 萬大幅提升至 $1,000 萬。故此若有新水炮車購入(價值大約 $900 萬),該項目將會被放入「小型機器、車輛及設備(整體撥款)」或「警隊特別用途車輛(整體撥款)」中,再不會獨立成項,公眾無從監察。見 2016 財政預算案簡介
【註 3】審核 2018-19 年度開支預算 管制人員的答覆 保安局 答覆編號 SB314
【註 4】審核 2019-20 年度開支預算 管制人員的答覆 保安局 答覆編號 SB012、SB147、SB248、SB249
【註 5】Section 23, Freedom of Information Act 2000 of United Kingdom

#開放政府研究
#公開資料
#資訊自由法
#財政預算

💰 月捐撐起本研 單次捐款支持亦可以!
📱 新設本研 Telegram Channel 立即追蹤!

本土研究社 Facebook

發表意見