立場新聞 Stand News

陳凱欣(如果)參選 橫批:攝灶罅

2018/8/29 — 8:22

陳凱欣近日頻頻現身社區活動,8 月 26 日在盂蘭文化節參與「搶孤」競賽。(圖片來源:陳凱欣 Facebook)

陳凱欣近日頻頻現身社區活動,8 月 26 日在盂蘭文化節參與「搶孤」競賽。(圖片來源:陳凱欣 Facebook)

由於陳凱欣未正式宣布參選,本文討論她「如果」參選。雖然不熟,筆者跟陳凱欣都算互識,以前沒甚麼印象她說要從政,做政助只認為是識高永文(做開醫療新聞)加人工高(特別是跟記者比)之故,而且好多政助最後都冇更上一層樓。所以聽到政情由吹高永文參選變成陳凱欣參選,都幾驚嚇。還有驚嘆,驚嘆一個正常人好人好姐要淪落到做親中派議員。

做得親中派議員,即是要做盡傷天害理殘民賣港之事。鉛水要拉勻一世計、人工島飄移當冇事、鋼筋剪斷話安全、灣仔沉降當正常、唔見全港選民資料係無心之失、賣港兩檢係依法辦事,六四一答即 hang 機……各種侮辱市民同自己智慧的大話要講個不停,所以話淪落。亦必然換來一身罵名,八婆、狐狸精、契女(*並非「契弟」的女性版)……諸如此類。

她是記者出身,雖然傳媒老闆多親中,但前線記者多支持民主(*不一定等於支持民主派),加入親中派,肯定為一部分記者朋友不齒,兩公婆人際關係受考驗。雖然稱不上黑材料 level,但同行都知陳凱欣不少八卦,唔洗問人索料就隨手寫到一堆出來,老公幫地產商工作、以前辦公室糾紛等等,難免被人拿出來講。所以陳凱欣參選,未見其利,先見其弊。

廣告

咁何又謂未見其利呢?做議員有甚麼得益先,名利?立法會議員好似好有影響力,但係人都知親中派議員只是扯線公仔聽西環點,社會精英唔會特別比面你,街上網上更是人人鬧得,所以額外的社會地位,冇。議員年薪約百萬,但政助都有,對陳凱欣來說這不是特別高,何況搵其他親中派公關 job 做可能都搵到唔少。

另一個未見其利,係我唔睇好佢會做到,或做得耐,議員。親中派內咁多人想上位,依家比妳陳凱欣攝到位,實有原因。一,此席勝算不高。上次九西民主派空降 + 內鬥,親中派則由地膽出擊 + 大動員,都只贏 2 千票,今次更難贏。二,就算贏咗此席,做唔夠 2 年就要換屆選舉,到時九西 6 席中有 4 個親中派要連任,肯定冇可能 4 席全保,至少要棄 1 個。棄邊個好?當然係唔係嫡系出身,又唔係西環契女的陳凱欣。

廣告

傳媒界內有俗語云,邊個得閒邊個做,今次九西補選咁搵丁的事,親中派個個計過發覺冇乜 jet so,連高永文都話 pass,於是比陳凱欣攝到灶罅做到剩女。總結我看陳凱欣如果參選,只係親中派求其搵隻棄子搏 ngar 住個位唔比民主派贏返,但正因係棄子,輸咗都不需太介懷,亦冇人要負責。陳凱欣則冒著眾叛親離,周街被人唱同問候的風險,參選一個勝算低,選中咗都係做得 2 年的位。但又有俗語云,牛唔飲水唔撳得牛頭低,若非追逐名利,點會上當?所以講到底,此其所願也。我真係恭喜你呀。

 

原刊於作者網誌

發表意見